'බල සෙනඟක' සෙවණැලි යට: ශ්‍රී ලංකාවේ 'නව ප්‍රජාතන්ත්‍රවාදය' සහ දෙමළ ජන දිවිය
- Post 25 June 2015
රාජපක්ෂ පාලන තන්ත්‍රය පරාජය කරමින් බලයට පත් අභිනව ආණ්ඩුව වෙනස් පිළිවෙත් මත අලුත් මගක යාම තම ඒකායන අභිලාෂය බව පුන පුනා කියයි. ඉකුත් පස් වසක් තිස්සේ කොළඹ දී මුළු දුන් 'විජයග්‍රහණයේ වීදි පෙළපාලි' මෙවර යුද විරු සමරුවක්' ලෙස මාතර දී වීදි බැසීම ගණන් ගැණෙන්නේ, මේ නව ප්‍රජාතන්ත්‍රික වෙනස්කම් යටතට ය. නමුත් ඉඩම් කොල්ලයටත්, හමුදාකරණයටත්, සෝදිසි හා අඩන්තේට්ටම්වලටත් යටත්ව දිවි ගෙවන උතුරු සහ නැගෙනහිර පළාත්වල දෙමළ ජනයාගේ ජීවිත පැරණි යුද බලහත්කාරයෙන් සැබැවින්ම නිදහස්ව ඇතිදැයි සොයා බැලීමට උත්සුක වන්නෝ විරල වෙති.
ඉකුත් මැයි මාසයේ ලංකාවේ චාරිකා කළ, 'කෝපරේට් වොච්' සංවිධානයේ පර්යේෂකයෙකු වන ෆිල් මිලර්ගේ නිරීක්‍ෂණයන් මගින් විදාරණය කරන්නේ ඒ යථාර්ථයයි.
(In the Shadow of Military: Sri Lanka’s ‘new democracy’ and Tamil people මැයෙන් වූ මෙහි මුල් ලිපිය පළමු වරට පළ වූයේ jdslanka ඉංග්‍රීසි වෙබ් අඩවියෙහි ය.)
මුල්ලිවයික්කාල් වූ කලී අද, කුඩා ධීවර ප්‍රජාවක් වෙසෙන මනරම් මුහුදු වෙරළකි. අලුත අල්ලාගත් මාළුන්ගෙන් - අඟමඩුවන් හා කුඩා මෝරුන්ගෙන් පවා පිරැවුණු ධීවර බෝට්ටු මුහුදු තීරය අද්දර පෙලගැසී තිබේ. තහනම් කරන ලද දෙමළ ඊලාම් විමුක්ති කොටි සංවිධානයේ (LTTE) අවසන් පාලන ප්‍රදේශය වූ බිම් තීරුවට ශ්‍රී ලංකා හමුදාවන් වගවිභාගයකින් තොරව එල්ල කළ ෂෙල්වෙඩි ප්‍රහාරයන් හේතුවෙන්, 2009 දී මේ වෙරළ තීරය දහස් ගණනක් වූ දෙමළ ජනයාගේ ලෙයින් පෙඟී ගිය බව සිතාගැනීමත් දුෂ්කර ය. 2012 දී තමන්ට නැවත මෙහි පැමිණීමට අවසර ලැබුණු බව ධීවරයෝ කියති. වෙරළ පසුපස ඇති ආවාටයක් වටා ගොඩගැසුණු වැලිකොට්ට කිහිපයක් හැරුණුකොට, සංහාරයක භෞතික සලකුණු මුළුමනින් පාහේ දැන් මකාදමා ඇත. එහෙත් දිවි ගලවාගත්තවුන්ගේ මතකයන්හි තවමත් තදින් වේදනාව කාවැදී ඇති අතර, බොහෝ දෙනෙක් දිවි ගැටගසාගැනීමට අරගල කරමින් අබලන් පැල්පත්හි දිවිගෙවති.
දෙමළ සුළුතරයේ දුක්ගැනවිලි සංහිඳියාවක් කරා ගෙන ඒමට ශ්‍රී ලංකාවේ නව ජනාධිපති සිරිසේනට හැකිවෙයි නම්, මුල්ලිවයික්කාල් වූ කලී ලිට්මස් පරීකක්‍ෂාවක් වනු ඇත. මෙහි වෙසෙන බොහොමයක් පවුල් නඩත්තු වන්නේ යුද්ධයේ අවසන් මාසවල දී සිය ස්වාමීන් අහිමි වූ වැන්දඹුවන්ගෙනි. නව ජනාධිපතිවරයා විසින් සිය ජීවිත සම්බන්ධයෙන් කිසියම් ම හෝ දියුණුවක් අත්කර දෙනු ලැබ ඇතිදැයි ඔවුන් පිරිසකගෙන් මා විසින් විමසන ලදුව, එක හඬින් නැගුණු ප්‍රතිචාරය වූයේ 'නැත' යන්න යි. උමා නමැති එක් කාන්තාවක් දෙවුර ගස්සමින් සිය හිස් දෑත් දෑල විදා කීවේ, සිරිසේන කිසිවක් කර නොමැති බව ය. මේ කාන්තාවෝ ඉන්දීය ආණ්ඩුවේ ආධාර යෝජනාක්‍රමයක් මගින් ඉදිකරන ලද නිවෙස්වල දිවිගෙවති. මේ යෝජනාක්‍රමය යටතේ ඉදිකැරුණු බොහොමයක් නිවාසවලට දොරවල් සවිකිරීම වූ කලී වියදම් අධික අමතර දෙයක් වී තිබේ. සොල්දාදුවෝ ට්‍රැක්ටර්වල හා ට්‍රක් රථවල නැඟී වටපිටාවේ නිදහසේ සරති. සිවිල් ඇඳුමින් සැරසුණු පොලිස් නිලධාරීහු කාන්තා රැස්වීම් මධ්‍යයේ ප්‍රාදූර්භූත වෙති. මුහුදු වෙරළ එහි සියලු සුන්දරත්වය තිබියදීත්, බියකරු ස්වභාවයක් උසුලයි.
ගරිල්ලන්ගේ මේ අතීත බලකොටුව හමුදා හා නාවික කඳවුරුවලින් ගහනව තැබීමට ශ්‍රී ලංකා ආණ්ඩුව වගබලාගෙන ඇත. උත්කර්ෂවත් යුද ජයග්‍රහණ ස්මාරකයන්ගෙන් මඟ දෙපස භූ දසුන කැළැල් වෙයි. පුපුරුවා හරින ලද ජල ටැංකි ‘‘නැවත විනාශයකට ඉඩ නොතබමු“ යි දෙමළාට මතක් කර දෙයි. අධිවේගී මාර්ගයේ ගමන් කරන විට සෑම විනාඩි දහයකට වරක් ම, විසල් දොරටුවලින් සහ සුඛෝපභෝගී ඇතුළත ගොඩනැගිලිවලින් සමන්විත හමුදා කඳවුරු දසුන් පථයේ ප්‍රාදූර්භූත වේ. මේවායින් ඇතැම් කඳවුරු ඇතුළත තරු පහේ හෝටල් සහ ප්‍රධාන සංචාරක ආකර්ෂණ ස්ථානයන් දැකගත හැකි ය. මේවායින් බොහොමයක් සොරාගන්නා ලද ඉඩම්වල ඉදිකැරී ඇති අතර, අවතැන් වැන්දඹුවන්ට සිය ඉඩම් ආපසු ලබාගැනීමේ කිසියම් හෝ ඉඩකඩක් ලබාගැනීම සඳහා සිය පවුල් විස්තර සමගින් හමුදාවේ ලියාපදිංචි වන්නැයි දන්වා ඇත. මෙය ඔවුන් ඉඩම් අහිමි වූවන් බවට දිගින් දිගටම පත්කර තබන නිර්දය නිලධාරීවාදී බිය ගැන්වීමකි. ගරිල්ලන් යටතේ මෙහි ජීවිතය වඩා හොඳ වූ නමුත්, එම ජීවන විලාසය විනාශකර දමා ඇතැයි මේ ස්ත්‍රීහු පවසති.
මළවුන් සිහිකිරීම
මැයි 18 වැනිදා මෙම විනාශයේ සයවැනි සංවත්සරය යි. 2009 පටන් ලොව පුරා දෙමළ ජනයා මේ දිනයේ දී සිය මියගියවුන් සමරනු වස් විශාල වශයෙන් එක්රැස් වී තිබේ. එහෙත් ශ්‍රී ලංකාව තුළ මළවුන් වෙනුවෙන් වැලපීමට සිදුව ඇත්තේ රහසිනි. යුද්ධාවසානයෙන් පළමු වසරේ දෙමළ සිවිල් සංවිධාන සංසදය පූජ්‍ය පක්ෂයේ ආගමික වතාවත් ඇතුළත් මළවුන් සැමරීමක් පැවැත්වීමට උත්සාහ කළත්, සිය ගණනක් සොල්දාදුවෝ පිටතින් එහි පැමිණියහ. "ඔබ මෙය සිදුකරන්නේ නම් මා ඔබ එල්ටීටීඊ අනුගාමිකයෙක් ලෙස සැක කරනු ඇතැ" යි හමුදාව සංවිධායකයන්ට ඇනතුරු ඇඟවී ය. සියල්ලන්ගේම හැඳුනුම්පත් ඔවුන් භාරයට ගැනුණු අතර, රාත්‍රියේ පූජකයන්ගේ නිවෙස්වලට ගිය පොලීසිය ඔවුන්ට වෙඩි තබන බවට තර්ජනය කළේ ය. එහෙත් දෙමළ ක්‍රියාධරයෝ නව ජනාධිපතිවරයාගේ පැමිණිමෙන් පසු ඇතිවූ ඊනියා 'නව ප්‍රජාතන්ත්‍රවාදයේ' තරම මැන බලමින් සිටිති.
"මේ අවුරුද්දේ මළවුන් සිහිකිරීම ප්‍රසිද්ධියේම කෙරෙනවා," එලිල් රජේන්ද්‍රන් පියනම මට තිරව කීය. එහෙත් ඔහු මුල්ලිවයික්කාල් හි සැමරුම් දේව මෙහෙය සඳහා ස්ථානයක් තෝරමින් සිටින අතර, ඉරි වැටුණු ටී ෂර්ට්වලින් සැරසුණු පුද්ගලයන් විසින් පදවාගෙන ආ අභිරහස් මෝටර් බයිසිකලයක් අප පසුපසින් නැවැත්විණි. මේ සිය සූදානම ගැන ඔත්තු බලන බුද්ධි අංශ නිලධාරීන් බව එලිල් පියතුමා පැහැදිළි කළේ ය. ප්‍රදේශයේ ජනයා මේ බියගැන්වීම් නොතකා සැමරුමට සහභාගී වීමට අධිෂ්ඨාන සහගතව සිටින බව පෙනෙන්නට තිබේ. සිය පුත්‍රයා යුද්ධාවසානයේ ඝාතනය වූ බැවින් තමන් එහි යාමට බිය නොවන බව උමා කියයි. දෙමළ ගම් නගර සිසාරා සූදානම සිදුවෙයි. තවත් සංවිධායකවරයෙක් හමුවීමට මා යාපනය බලා යන විට ඔහු ගේ සැමරුම ‘සාමය කඩවීම වැළැක්වීම සඳහා' තහනම් කර ඇති බවට වූ පුවත පැමිණියේ ය. ප්‍රතිවාදී දෙමළ දේශපාලන කණ්ඩායම් අතර ගැටුමක් ඇතිවීමට ඉඩ ඇතැයි බලධාරීහු පවසති. මෙය විශ්වාස කළ නොහැකි හේතුවකි. පොලීසිය මහජන ක්‍රියාකාරකම් තහනම් කිරීමට හෝ සීමා කිරීමට ව්‍යාජ හේතු සොයා ගන්නවා හැරෙන්නට නිදහස් එක්රැස්වීම් සඳහා පහසුකම් සැළසීමට කැමැත්තක් නොදක්වයි.
විපක්ෂයට අයත් දෙමළ දේශපාලන පක්ෂයක් වන දෙමළ ජාතික ජනතා පෙරමුණ (TNPF) තහනම ම හැරීම සඳහා අවසන් මොහොතේ ස්ථානය වෙනස් කරමින් මරුදන්කෙර්නි හි අප්‍රකට වෙරළ තීරයක තාවකාලික සෙවනකට රැස් වෙයි. බස්රථ වළ-ගොඩැලි සහිත සහිත පාරේ සැතපුම් ගණනක් දුරට අවදානම් ගමනක යෙදෙන අතර, වැඩි වේලා නොගොස් ම සියයකට වැඩි පිරිසක් පැමිණ සිටිති. දෙමළ ජාතික වර්ණ වන රතු සහ කහ පැහැ රැලිකොඩි හතර වට එසැවෙන අතර, පහන් ද දැල්වේ. සැමරුම පැවැත්වෙන නමුත්, ශ්‍රී ලංකා හමුදා බුද්ධි අංශ එහි සිටින සියල්ලන් ඡායාරූපගත කරමින් සිටින බව සංවිධායකයෝ පවසති. එලිල් පියතුමාගේ මුල්ලිවයික්කාල් බහු ආගමික සැමරුම් වතාවත් ද දැඩි සුපරීක්‍ෂාව මධ්‍යයේ වුව ඉදිරියට ඇදිණි. සහභාගී වූවෝ තමන් ඡායාරූපයට නඟන බුද්ධි අංශ නිලධාරීන් ඡායාරූපයට නැඟීම ඇරැඹූ අතර, ඇතැම්විට එය බිය නම් බාධකය අත්හැර දැමීමේ සළකුණක් විය හැකි ය. යාපනය සරසවියට සිය ගණනක් සිසුන් හා කාර්ය මණ්ඩල එක්රැස් වූ අතර, ශ්‍රී ලංකාවේ දෙමළ ප්‍රදේශයන්හි සෑම අස්සක මුල්ලකම මළවුන් සැමරීම සිදුවිය. එය නිර්භීත ක්‍රියාකාරීත්වයක් වුව, ඊනියා ප්‍රජාතන්ත්‍රවාදය සම්බන්ධයෙන් තැතිගන්වන සුළු නිදසුනකි.
දෙමළ ජාතික සන්ධානයට එදිරිව දෙමළ ජාතික ජනතා පෙරමුණ
කලින් කැරලිකරුවන් යටතේ පැවැති ප්‍රදේශවල සියලුම ආසන පාහේ දිනාගත් දෙමළ ජාතික සන්ධානය (TNA) දෙමළ ජාතික ඡන්ද දායකයන්ට ඇති සාම්ප්‍රදායයික තේරීම යි. එහෙත් දෙමළ සන්ධානය, නව ජනාධිපතිවරයාගේ හදිසි ප්‍රතිසංස්කරණ සම්බන්ධයෙන් ප්‍රමාණවත් පරිදි අභියෝග නොකරන්නේ යැයි බොහෝ ජනයා 
සිතති. ප්‍රතිවාදී දෙමළ ජාතික ජනතා පෙරමුණේ නිර්මාතෘ ගජේන්ද්‍රකුමාර් පොන්නම්බලම් පවසන්නේ දෙමළ ජනයා දුර්වල කේවල්කිරීමේ ආස්ථානයකට ඇදදමමින් දෙමළ සන්ධාන නායකත්වය සිරිසේනට ඔහු ගේ ජනාධිපතිවරණයේ දී “කොන්දේසි විරහිත" සහයෝගයක් ලබාදුන් බව යි. දෙමළ සන්ධානය සම්මුතිකාමීන් බවට පත්වෙමින් එන්නේය යන බියෙන් පක්ෂය හැර යන තුරුම, යුද්ධාවසානය දක්වා පොන්නම්බලම් එම සන්ධානයේ පාර්ලිමේන්තු මන්ත්‍රීවරයෙක්ව සිටියේ ය. ශ්‍රී ලංකාවේ පාර්ලිමේන්තු මැතිවරණයක් ඕනෑ ම මොහොතක පැවැත්වීමට නියමිත අතර, දෙමළ ජාතික සන්ධානයේ මෑතකාලීන ක්‍රියාකාරීත්වය පිළිබඳ නොකැමැත්තෙන් සිටින දෙමළ ජනතාව වෙත ළඟාවිය හැකිනම් දෙමළ ජාතික ජනතා පෙරමුණට අවම වශයෙන් එක් පාර්ලිමේන්තු අසුනක් හෝ අත්කරගැනීමේ අවස්ථාව හිමි වේ. එහෙත් දෙමළ සන්ධානය සතු ධනබලය, මාධ්‍ය කෙරේ බලපෑම හා දෙමළ කොටි සංවිධානය සමග වූ ඓතිහාසික සබඳතා හේතුවෙන් ඔවුන්ට එරෙහිව යාම අපහසු වනු ඇති බව පොන්නම්බලම් පවසයි.
මෙවර ආපසු පාර්ලිමේන්තුවට නොගියත් "ඡන්ද පෙට්ටියට බැහැරින් බලය ගොඩනැංවීමට" තමන් වැඩි උනන්දුවක් දක්වන බව පොන්නම්බලම් කියයි. ඔහු එයින් දහස් කරන්නේ "දෙමළ ජනතාවට සැබෑ සහන සමහරක් ඇතිකිරීමට ශ්‍රී ලංකා රාජ්‍යයට බලකළ හැකි සාමකාමී මහජන බලමුළුගැන්වීමකි." දශක තුනක සන්නද්ධ අරගලය තුළ පෙන්නම්බලම්ගේ වත්මන් චින්තනය හා සමගාමී වන ක්‍රියාකාරකම් මාලාවක් වී නම් ඒ උතුරු නැගෙනහිර නගර සිසාරා දෙමළ ස්වයං නිර්ණය අයිතියට සහාය දැක්වීම උදෙසා සිය දහස් ගණන් ජනයා බලමුළු ගැන්වූ පොන්ගු තමිල් (දෙමල නැගිටීම) රැස්වීම් ය. පෙංගු තමිල් වැඩහටහන් සමග මහා ජනබලයක් සේ එක්රැස්වීමට කලින්, සිය කතා බෙදාහදා ගැනීමට ප්‍රාදේශීය ජනයා තුළ විශ්වාසය ඇතිකරගත් කුඩා නාට්‍ය දර්ශන සංවිධානය කළ ආකාරය හා ඒ වෙනුවෙන් ඔවුන් සජීවීකාරකයන් ගම්වලට යැව් ආකාරය මෙම ක්‍රියාකාරීත්වයන් ආරම්භ කිරීමට මුල් වූ ජේ*, මා හා පැවසී ය. එහෙත් දෙමළ ජනතාවට ඒ පරිමාණයේ බලමුළුගැන්වීමකට අවශ්‍ය නිර්භය භාවය යළි ලබාගැනීමට වසර 5ක් 10ක් ගතවන්නට ඉඩ ඇති බව ඔහු සිතයි.
ලිංගික හිංසනයට විරෝධයද, ජාතික ආරක්ෂාවට තර්ජනයක්ද?
එසේ වෙතත්, 18 හැවිරිදි පාසල් ශිෂ්‍යා සිවලෝගනාදන් විත‍්‍යා යාපනයෙන් ඔබ්බෙහි වූ පුන්ගුඩුතීවූ දිවයිනේදී මැයි 14වැනි දා අතවර කොට ඝාතනය කරනු ලැබීමෙන් පසු දෙමළ කලාප සිසාරා නිරායාස විරෝධතා පැතිර ගියේය. දැරිය ආගිය අතක් නැති බව ඥාතීන් පැමිණිලි කළ තැන පොලීසිය කියා ඇත්තේ ඇය සමහර විට පෙම්වතා සමග පැන යන්නට ඇති බවයි. ශ්‍රී ලංකාවේ ලිංගික හිංසනය සහ ආරක්ෂක හමුදා එකට බැඳී යන්නක් වුවත් මේ ඝාතනයේ ප්‍රධාන සැකකරුවෝ සාමාන්‍ය දෙමළ වැසියෝ වෙති. එක් දෙමළ වෛද්‍යවරයකු මට කීවේ 'කැරළි මර්ධන මුලෝපායක් යටතේ, පොලිසියත් හමුදාවත් විසින් තරුණ පරපුර මත්ද්‍රව්‍යවලට පොළඹවනු ලැබීමේ පීඩනයට යටත් කළ සමාජයක බිඳ වැටීම' මෙමගින් විදහා දැක්වෙන බවයි.
කොවින් ඇළලුණු පාසල් දරුවන් පොදි ගැසී වීදියට බට අතර යාපනයෙන් සැතපුම් සිය ගණන් දුර නගර හර්තාල වලින් වසා දමනු ලැබිණි. දෙමළ කාන්තාවන්ගේ අනාරක්ෂිත බව පිලිබඳ පැතිරුණු කලකිරීමකුත්, කැරළි කරුවන් භූමිය අත් පත් කොටගෙන සිටි සමයේ කාන්තාවන්ට වීදිවල සුරක්ෂිතව ඔබ මොබ යාමට පුළුවන් කම තිබූ කාලය ගැන යම් තරමක කාංසාවකුත් විරෝධතා විසින් පෙන්නුම් කෙරිණි. එහෙත්, මේ විරෝධතා 2012 සිදුවූ දිල්ලි බස්රියේ සමූහ අතවරයට එරෙහි ඉන්දීය විරෝධතා විලස තිරසාර මහජන ව්‍යාපාරයක් බවට පත්වේදැයි යන්න කීමට තවමත් කල් වැඩි ය. මේ විරෝධතා අලුත් 'දෙමළ කොටි රැල්ලක්' ලෙස හංවඩු ගසන්නට දැනටමත් පටන් ගෙන ඇති දැඩි මතධාරී සිංහල ජාතිකවාදී දේශපාලකයන් ඉල්ලා ඇත්තේ දැඩි ප්‍රහාරයක් දියත් කරන ලෙසයි. ලිංගික හිංසනයට එරෙහි උද්ඝෝෂණ පවා දකිනු ලබන්නේ ජාතික ආරක්ෂාවට තර්ජනයක් විලසිනි. ‘ත්‍රස්තවාදය නැවත හිස එසවීමට’ වලක්වාලනු පිණිස ‘ජාතික ආරක්ෂක සැලසුමක්’ ක්‍රියාවේ යොදවන බවට ජනාධිපතිවරයා සහතික වී තිබේ. මැයි විසි වැනිදා යාපනයේ වීදි බට ජනී ජනයාට පාරට පැමිණි කැරළි මර්දන පොලිසිය, විශේශ කාර්ය සාධක බලකාය, ත්‍රස්ත මර්ධන කොමාන්ඩෝ භටයන් හා යුද සෙබළුන් ගේ කඳුළු ගෑස් ප්‍රහාරයට මුහුණ දීමට සිදුව අතර 127 දෙනකු අත් අඩංගුවට ගනු ලැබිණි.
නීතියේ ආධිපත්‍යය හමුදාකරණය වී තිබියදීත්, ශ්‍රී ලංකාවේ පොලිසියට බ්‍රිතාන්‍ය ආණ්ඩුව තවමත් පුහුණුව ලබා දෙන්නේ ඒ සඳහා වන කොන්ත්‍රාත්තුව 2015 මාර්තුව වන විට අහෝසි වී තිබියදී ය. ස්කොට්ලන්ත පොලිස් විද්‍යාලයේ පිරිසක් මේ ලියන මොහොත වන විට සති තුනක සංචාරයක් සඳහා ශ්‍රී ලංකාවට ගොස් සිටිති. බදු ගෙවන්නන්ගේ මුදලින් කෙරෙන ඔවුන්ගේ ‘ආධාර’ කටයුතුවල ඉලක්කය ලෙස දක්වා ඇත්තේ ‘ප්‍රජා පොලිස් කටයුතු, ආචාර සම්පන්න නායකත්වයක් සහ සංවිධාන කළමනාකරණය’යි. කාකි නිල ඇඳුමින් සැරසී, AK 47 න් සන්නද්ධ ඇතැමුන්ගෙන් සැදි පොලිස් බලකායද, බලකොටු සේ දිස්වන පොලිස් ස්ථානවලින් යුත් දෙමළ නගරද එම අරමුණු වලට හරස්ව යන බව පෙනේ. දෙමළ පුරවැසි සංසදයේ එක් සාමාජිකයකු මට කීවේ මෙයයි: “දෙමළ අපට නම් හමුදාවත් පොලිසියත් අයත් වන්නේ එකම ගණයටයි. ඒ දෙගොල්ලන්ම කතා කරන්නේ සිංහල. අපේ තරුණයන්ට හිරිහැර කිරීම සහ ගුටි බැට දීම පටන් ගත්තේ ඔවුන්. කිසිම දියුණුවක් පෙනෙන්න නැහැ. සිංහල පොලිසිය දෙමළ ප්‍රදේශවලට පැමිණි විට වෙනම පිරිසක් බවට පත් වෙනවා.”
'රණවිරු දිනය'
බහුතර සිංහල බෞද්ධ ප්‍රජාව අතර බලවත් සේ ප්‍රතිරාව නගමින් සන්නද්ධ සේනාවලට මහත් අනුග්‍රහයක් ලබාදෙන කාරණයක් වී ඇත්තේ දෙමළ නැගිටීමක් පිලිබඳ භීතියයි. විමුක්ති කොටි සංවිධානය පරදවා සිංහල පදිංචි කරුවන් දෙමළ භූමියට තල්ලු කළ හිටපු ජනාධිපති රාජපක්ෂ, මේ දෙමළ විරෝධී මනෝභාවය මුර්තිමත් කළේය. පුද්ගලික මුල්‍ය වංචා ඔහුගේ ජනපති ධුරය අහිමි කිරීමට මග පෑදුවේ වුවද, දේශපාලන අවකාශයේ ඔහු තවමත් හොල්මන් කරයි. මහින්ද රාජපක්ෂ ගේ ජයෝන්මාදවාදී වාර්ෂික රණ විරු පෙරෙට්ටුව වෙනුවට මැයි 19 වැනිදා, වඩා 'ගෞරවනීය අනුස්මරණ දිනයක්' පවත්වන බවට නව ජනාධිපතිවරයා පොරොන්දු විය. එහෙත්, අවසානයේදී වචනවල වෙනසකට පමණක් සීමාවී පවත්වනු ලැබුයේ පෙර වසරවල සේම වූ සමරුවකි. “රාජපක්ෂවරු මැයි 19 දා සැමරුවේ ‘යුද ජයෝත්සවයක්’ ලෙසිනි. තමන් රාජපක්ෂවරුන් නොවන බවත්, තමන් වෙනස් අය හෙයින් සියලු සුළු ජාතීන් සමරන බවත් කියා පෑමේ ජාත්‍යන්තර ප්‍රතිරූපයක අවශ්‍යතාවෙන් මේ අලුත් පිරිස පෙළෙති,” යි සිංහල මාධ්‍යවේදියකු වන කුසල් පෙරේරා පැවසීය. “ඉතින් ඔවුන් කළේ, මේ ‘යුද ජයග්‍රහණයේ දිනය’ වෙනත් ලේබලයක් අලවා ‘යුද විරුවන් සැමරීමේ දිනය’ ලෙස නම් කිරීමයි”.
එහෙත් සමරු උත්සවයේදී සිදු කෙරුනේ රාජපක්ෂ කළ දේම ය. මේ වනාහී, සිංහලොත්තමවාදී මතවාදය තවත් දශක ගණනාවක් දිගටම පවත්වාගෙන යාමේ ක්‍රමයකි. මේ සියල්ල පොදි ගසා ඇත්තේ ‘අනුස්මරණ දිනය’ නම් වෙනත් අලෙවි නාමයකිනි. එහෙත්, ආරක්ෂක අමාත්‍යාංශ වෙබ් අඩවියට පිවිසි කළ ඇත්තේ වෙනත් භාෂාවකි. එහි තවමත් සඳහන් වන්නේ ‘රණවිරු දිනය’ ගැනයි.
නව ජනාධිපතිවරයාගේ ජය සාදරයෙන් පිළිගත් කොළඹ සිටින මාධ්‍යවේදීන් පවා දෙමළ ජනතාව අරබයා සිදුවිය හැකි වෙනස කුමක්ද යන්න පිළිබඳව සිටින්නේ සැකයෙනි. ශ්‍රී ලංකා වෘත්තීය පත්‍ර කලාවේදීන්ගේ සංගමයේ සභාපති ලසන්ත රුහුණගේ ප්‍රකාශ කළේ මාධ්‍යවේදීන් මුහුණ පා සිටින තර්ජන පෙර පාලන සමයේ පැවතියාට සාපේක්‍ෂව අඩු වුවත්, අතුරුදහන් කෙරුණු මාධ්‍යවේදීන් පිළිබඳව විමර්ශනය සඳහා කොමිසමක් පත් කිරීම නව ජනාධිපතිවරයා විසින් ප්‍රතික්‍ෂේප කොට ඇති බවයි. රට හැර යාමට බලකෙරුණු තවත් බොහෝ දෙනකුට තවමත් ආපසු යා නොහැක. තමන් සේවය කරන කාර්යාලමාධ්‍ය ආයතනයේ දැවැන්ත යකඩ ගේට්ටු දෙකකින් ඇතුල් වෙද්දී තවත් වාර්තාකරුවකු මා හා ප්‍රකාශ කළේ, ආණ්ඩුවට සම්බන්ධ කල්ලි විසින් තම සේවා ස්ථානයට දෙවතාවක්ම බෝම්බ ගසන ලද බවයි. දුෂණ වංචා පිළිබඳව සෙවිල්ලෙන් සිටීමට ඉඩ සැලසෙන තොරතුරු දැනගැනීමේ පනතක් කෙටුම්පත් කොට ඇතත්, ‘ජාතික ආරක්‍ෂාව’ යන්න නිර්වචනය කිරීමකින් තොරව ජාතික ආරක්‍ෂාව සම්බන්ධයෙන් විමසීමට පනවා ඇති සීමා පිළිබඳව රුහුණගේ සැලකිලිමත් වෙයි.
බිම් තීරු
බලයේ රැඳී සිටීමට නම් ශ්‍රී ලංකාවේ පාලකයෝ සිංහල ජාතිකවාදයටත්, බෞද්ධ බලපෑමටත් අනුබල දැක්විය යුතුය. සුළු පරිමාණයෙන් හෝ දෙමළ ඉඩම් නැවත ඒවායේ අයිතිකරුවන්ට පැවරීම සලකනු ලබන්නේ පාවා දීමක් ලෙසිනි. ජනාධිපති සිරිසේන පාර්ලිමේන්තු මැතිවරණයට පෙර දෙමළ ජනතාවට පමණ ඉක්මවා යමක් දෙතොත්, රාජපක්ෂ ඡන්දය දිනා ආපසු පැමිණීමේ ඉඩක් ඇතැ’යි නිරීක්‍ෂකයෝ අනතුරු අඟවති. එහෙත් දෙමළ පුරවැසි සංසද සාමාජිකයෙක් කියා සිටියේ මෙයයි: “දෙමළ ජනතාව තමන්ගේ ඉඩම් ලබා ගත යුත්තේ මන්දැයි සිංහල ඡන්දදායකයන්ට පහදා දීමට හෝ සිරිසේන වීරිය නොකරන්නේ නම්, බලයට පත් වූ කල ඒ සම්බන්ධයෙන් කටයුතු කිරීමට ඔහුට වරමක් නැති වන්නේය. එවිට දෙමළ ජනයාට කිසිත් නොලැබී යන්නේය.”
ශ්‍රී ලංකා යුද හමුදාව 2006 දී පහර දෙනවිට තම ගම් බිම් දමා වැසියන් පලාගිය සාම්පූර් ප්‍රදේශය එක් නිදසුනකි. දිවි ගලවාගත්තවුන් පවසන්නේ බෝට්ටු මගින් තමන් පලායාමට පෙර ගම්වාසීන් හැත්තෑ දෙනකු ෂෙල් ප්‍රහාරවලින් මරුමුවට පත් වූ බවයි. ඉන් අනතුරුව කිහිප වතාවක් තැනින් තැන යාමට සිදුවූ එහි සිටි පවුල් දහසක පමණ ජනතාව 2009 දී ගාල් කෙරුනේ සාම්පුර් කරා දිවෙන පාරෙන් එහා පැත්තේ තාවකාලික කඳවුරුවල ය. ඒ වනවිට ඔවුන්ගේ ගේ දොර බුල්ඩෝසර් කොට ඉඩම් නාවික හමුදාව විසින් කටුකම්බි ගසා කොටු කරගෙන තිබිණි. ප්‍ර්‍රදේශයෙන් කොටසක් ඇමරිකානු ඩොලර් බිලියන හතරක මුදලකට විදේශීය ආයෝජකයන්ට පවරා තිබුනේ බැර කර්මාන්ත ශාලාවක් ඉදි කරනු පිණිසය. එහෙත්, ගම හැර යාම ප්‍රතික්‍ෂේප කළ සාම්පුර් වැසියන් ඉඩම් අයිතිය ඉල්ලා පැවරූ සුවිශේෂ නඩුවකින් තම ඉඩම් ආපසු දිනා ගැනීමේ හැකියාව 2015 මැයි 20 දා ඇතැමුන්ට ලැබිණි. මේ වනතුරු තම ඉඩම් ආපසු ලබා ගත හැකි වී ඇත්තේ ඒ පවුල් වලින් පහෙන් පංගුවකට පමණි. තමන් විසින් විනාශ කරනු ලැබූ නිවාස නැවත ඉදි කිරීම සඳහා රජය මේතාක් කිසිදු මුදලක් ලබාදී නැත.
පසුදා මම සාම්පුරයට යනවිට ගම්වාසීහු තම ගේදොර වල සුන්බුන් ඇති තැන් සොයා ගැනීමට යුහුසුළුව එහා මෙහා යමින් සිටියහ. එක් පවුලකට සොයා ගත හැකිව තිබුනේ ගඩොල් ගොඩක් පමණි. බොන වතුර ළි ගරා වැටී තිබුණු අතර, අඹ හා පොල් ගස් කටු කොහොලින් යටවී ගොසිනි. භුමිය හෙළි පෙහෙළි කර ගන්නට දරන කලබලකාරී උත්සාහයේදී වල් කොටා හැම තැනම පාහේ ගිනි ගොඩවල් ගසා තිබුණි. නාවික හමුදාව ආපසු පැමිණ ඉඩම් කොල්ලකෑම වළකනු පිණිස අද රාත්‍රියේ පැල් රැකීම ගමේ පිරිමින්ගේ උවමනාව විය. එහෙත් කාන්තාවන් එහි රැය ගත කිරීම අනතුරුදායක බව ඔවුන් ප්‍රකාශ කළේ මීටර 100ක් එපිටින් වූ නාවික හමුදා කඳවුර දෙස බයාදු බැලුම් හෙළමිනි.
ශ්‍රී ලංකාවේ ‘නව ප්‍රජාතන්ත්‍රවාදය’ යනු මෙය නම්, දෙමළා තවමත් ජීවත් වන්නේ හමුදාවේ සෙවනැල්ල යටතේය.☐
ෆිල් මිලර්
© JDS
