JDS Sinhala

ෆිදෙල් කස්ත්‍රෝ: 'පල්ලියට සේම විප්ලවයට ද විරුවෝ සිටිති'

කියුබානු විප්ලවයේ කීර්තිමත් නියමුවෙකු වූ ෆිදෙල් කස්ත්‍රෝ, 2016 නොවැම්බර් 26 වැනිදා ස්වකීය දිගු දිවි සැරිය නිම කළේය. දුගීභාවයෙන් හා පීඩනයෙන් මැඩලන ලද දක්‍ෂිණාර්ධගෝළයේ පීඩිත මහාද්වීපයන් නිවැසි කොටගත් ජනයා තුළ නිදහස හා සමානත්වය පිළිබඳ අනුරාගය අවුළුවා ලූ විප්ලවකාරී  ගිනි සිළක් ඔහුගේ මරණයෙන් නිවී ගියේය.

කෲර ඒකාධිපතියෙකුගේ සිට අසහාය විප්ලවීය නායකයෙකු දක්වා වන පුළුල් පරාසයක් තුළ තබා ඔහු පිළිබඳ කෙරෙන විවරණ දැන් වසංගතයක් මෙන් පැතිර යයි. මෙහි පළවන්නේ එවැන්නක් නොවේ. මේ වනාහී පශ්චාත් විප්ලවීය කියුබාවේ, ගරා වැටෙන ගොඩනැඟිලි සහ යල්පිනූ මෝටර් රථ විසින් හෙළි නොකරන යථාර්ථයන් පිළිබඳ කස්ත්‍රෝගේම පැහැදිලි කිරීමකි. එය සකසා ගැණුනේ අදින් දහඅට වසකරට පෙර එළඹි එක්තරා ඓතිහාසික මොහොතක් ආශ්‍රයෙනි.

'යක්ෂයාගේ කොමියුනිස්ට් මිථ්‍යා දෘෂ්ඨිය' අත් නොහැරලන කියුබාවට දහ අට වසරකට පෙර ගොඩබට දෙවියන් වහන්සේගේ වතිකානු නියෝජිතයා වූ දෙවැනි ජුවාන් පාවුළු පාප්තුමා 1998 ජනවාරි 21 වෙනි දා දෙදණ බිම ඇන කියුබාවේ මහපොළව සිම්බේය. පිළිගැනීමේ කතාව කළේ කියුබානු නායක ෆිදෙල් කස්ත්‍රෝ ය.

'දෙවියන් වහන්සේගේ නියෝජිතයා වන පාප් වහන්සේ සහ මිනිස් වර්ගයාගේ නියෝජිත කැස්ත්‍රෝ අතර හමුවීම ආශ්චර්යමත් එකකැ'යි නිකරගුවාවේ සැන්ඩිනිස්ටා නායකයෙකු වන තෝමස් බෝර්ජේ කීවේ මේ ඓතිහාසික හමුව ගැන ය. 

දැන් ශෝකයේ සහ අවිනිශ්චිතභාවයේ වඩදිය රළ නැඟ එන කුඩා කැරීබියානු දූපතක් හැට වසකට පෙර වහල් බවේ සහ දරිද්‍රතාවයේ සේනා විසින් වටලන ලද නරකාදියක්ව තිබිණ. ඒ ජනයා අසමානත්වයේ කුරුසියෙන් ගළවා ගනු පිණිස සටන් කළ මිනිසුන්ගේ අධිෂ්ඨානයෙන් මානව ශිෂ්ටාචාරයේ වික්‍රමාන්විත පරිච්ඡේදයක් ලියන්නට පුරෝගාමී වූ මිනිසෙක් පිළිබඳ මතකය මේ යුගයේ රජයන බුද්ධි විහීන නරුමවාදය තුළ ගිල්වා දැමීම අපරාධයකි.

1998 අප්‍රේල් මාසයේ පළ වූ 'හිරු' සඟරාව වෙනුවෙන් මුල්වරට සිංහලට නඟා පළ කෙරුණු මෙම ලිපිය දහ අට වසරකට පසු යළි පළ කරන්නේ එබැවිනි.

සංස්කාරක කමිටුව


ශුද්ධ වූ පියතුමනි,

ඔබ විසින් සිපගන්නා ලද භූමිය ඔබේ පැමිණීමෙන් ගෞරවයට පාත්‍ර විය. පළමු යුරෝපීයයන් ළඟාවන විට මෙහි වාසය කළ සාමකාමී වූත් උදාර වූත් ස්වදේශික ජනතාවන් ඔබට හමු නොවනු ඇත.  ප්‍රතිරෝධයක් දැක්වීමට නොහැකි වූ සූරාකෑමෙන් සහ වහල්භාවයෙන් බොහෝ මිනිසුන්, සමූල සංහාරය වූ අතර ස්ත්‍රීන් සන්තුෂ්ඨිය සඳහා වූ වස්තූන් බවට හෝ දේශීය වහළුන් බවට පෙරළනු ලැබිණ. එමෙන්ම මනුෂ්‍ය ඝාතක අසිපත් මඟින් හෝ ආක්‍ර‍මණිකයන් විසින් ගෙන එන ලද නොදන්නා වසංගතයන්ගෙන් මරණයට පත්වූවෝද වෙති. ඇතැම් පූජකයෝ ඒ සා වූ සාපරාධයන්ට විරෝධය පළකරනු වස් මෙබිම හැර ගියෝය.

ශත වර්ෂාධික කාල වකවානු තුළ දුර ඈත ඔවුන්ගේ බිම්වලින් කෘෘරතර ලෙස උදුරා ගන්නා ලැබූ දස ලක්ෂ සංඛ්‍යාත අප්‍රිකානුවන්, මෙහි සමූල ඝාතනය කළ වහල්භාවයට පත් ස්වදේශිකයන්ගේ ස්ථානය ගනු ලැබිණ. වාර්ගික සම්මිශ්‍ර‍ණය වෙත ද, අප රටෙහි වත්මන් ජනගහනයෙහි ප්‍ර‍භවයන් වෙත ද අපූර්වතර දායකත්වයක් ඔවුන් විසින් ලබා දුන් අතර මෙම නාටකාකාර ඉතිහාසයේ සියළු සහභාගිකයන්ගේ සංස්කෘතීන් ද, විශ්වාසයන් ද, රුධිරය ද සම්මිශ්‍ර‍ණය වී තිබේ.

මෙම භූගෝලාර්ධය දිග්විජය හා යටත්විජිතකරණයේ ප්‍ර‍තිඵල වශයෙන් හැත්තෑ මිලියනයක් ස්වදේශිකයන් මරණයටත්, දොලොස් මිලියනයක් අප්‍රිකානුවන් වහල්භාවයටත් හෙළනු ලැබී යැයි ගණන් බලා තිබේ. මහත් ලෙස රුධිරය වගුරුවනු ලැබූ අතර බොහෝ අයුක්තීන් සිදුකෙරිණ. අරගලයන් හා පරිත්‍යාගයන්ගෙන් යුතු ශතවර්ෂ ගණනාවකින් පසුව ද ආධිපත්‍යයේ හා සූරාකෑමේ නව ආකාරයන් යටතේ මෙකී අයුක්තීන්ගෙන් විශාල අර්ධයක් තවමත් ශේෂව පවතී.

අතිශයින් දුෂ්කර කොන්දේසි යටතේත් කියුබාව ජාතියක් වශයෙන් සංලක්ෂිත වන්නට සමත් වූවාය. තම නිදහස සඳහා මැඩළිය නොහැකි වීරෝධාරත්වයකින් යුතුව එකලාව සටන් කරන්නට එයට සිදුවිණ. ස්ථිර වශයෙන්ම සිය වසරකට පෙරාතුව දේශපාලන වධ කඳවුරු තුළ බිහිසුණු සමූල ඝාතනයන් අත් විඳින්නට කියුබාවට සිදුවූ අතර වයස්ගතවූවන්, ස්ත්‍රීන් හා දරුවන් බොහෝමයක් ඇතුළත් එහි ජනගහනයෙන් විශාල කොටසක් ඉන් වැනසී ගියහ; මනුෂ්‍යත්වයේ හෘදය සාක්ෂියෙන් එය අමතකව ගොස් ඇතැයි යන කාරණාව විසින් එම සාපරාධයේ මෘගත්වය අඩුව නොයන්නේය.

ශුද්ධ වූ පියතුමනි,

ආර්ථික, දේශපාලනික සහ මිලිටරිමය වශයෙන් ඉතිහාසයේ අතිශයින්ම ප්‍ර‍බලතම බලවතාගේ පාලනය හා අණ පිළිගැනීම ප්‍ර‍තික්ෂේප කරන්නා වූ මෙම ජනතාව සාගතය, රෝගීභාවය සහ සමස්ත ආර්ථිකයේම ගෙළ සිරකිරීම මඟින් යටපත් කරන්නට ඇතැම්හු අද වෑයම් කරති. සාපරාධයන් සාධාරණීකරණය කරන්නට බිහිසුණු අපවාදයන්ට ලක්කරන ලද ක්‍රිස්තියානින් මෙන්ම, අප ද අපවාදයන්ට ලක්කරනා ලද අතර, අපගේ ස්ථිරසාර විශ්වාසයන් අත්හරිනවා වෙනුවට දහස් වාරයක් මරණය අපි තෝරාගන්නෙමු.

පල්ලියට සේම විප්ලවය සතුව ද බොහෝ විරුවෝ සිටිති.

ශුද්ධ වූ පියතුමනි,

වත්මන් ලෝකයේ බොහෝ වැදගත් කාරණාවන් ඔබට සංවේදනය වන්නා හා සමානව අපට ද සංවේදනය වන අතරම එය එසේ වීම ගැන අපි සතුටු වන්නෙමු; සෙසු ප්‍ර‍ශ්න සම්බන්ධයෙන් අපගේ දැක්ම වෙනස් වූව ද ඔබ ආරක්ෂා කරන අදහස් කෙරෙහි ඔබේ ඇති තිරසාර ශක්තිමත් විශ්වාසය කෙරෙහි අපි ගරු කරමු. ලෝකය වටා වූ ඔබේ දිගු වන්දනාවේ දී, බොහෝ අයුක්තීන් ද, අසමානතා හා දරිද්‍ර‍තාවන් ද, වගා නොකළ ඉඩම් හා ඉඩම් අහිමි ගොවීන් ද, විරැකියාව, සාගතය හා රෝගීභාවය ද, කුඩා මුදලකින් රැකගත හැකිව තිබූ මුත් එසේ නැතිකමින් වැනසී යන ජීවිත ද, නූගත්භාවය, ළමා ගණිකා සේවනය සහ ජීවත්වීම සඳහා සිඟමනේ යෙදෙන හෝ වැඩකරන සය හැවිරිදි දරුවන් ද, ජීවත්වීමට නුසුදුසු තත්ත්වයන් යටතේ පැල්පත් නගරවල ජීවත්වන කෝටි සංඛ්‍යාත ජනයා ද, ජාතික සහ ලිංගික වෙනස්කම් ද, ස්වකීය බිම්වලින් නෙරපා හරිනු ලැබූ මුළුමහත් ජනවර්ග සමූහයන් ද, පිටස්තර ජනයා කෙරෙහි වන නොරිස්සුම හා වෙනත් ජනයා කෙරෙහි වන පිළිකුළ ද, විනාශ කරන ලද හෝ විනාශ කරමින් පවතින සංස්කෘතීන් ද, ඌන සංවර්ධනය හා අධික පොළී සහිත ණය ද, නොගෙවිය හැකි සහ එකතු කළ නොහැකි ණය ද, අසාධාරණ හුවමාරු ක්‍ර‍ම ද, සාහසික සහ ඵලදායි නොවන මූල්‍ය සමපේක්ෂණයන් ද, කෘෘර ලෙස විනාශ කරන ලද පරිසරික පද්ධතීන් ද, අදමිටු අවි වෙළඳාම් හා පිළිකුල් සහගත ලෙස ලාභ උපදවීමේ අභිප්‍රායන් ද, යුද්ධ, ප්‍ර‍චණ්ඩ ක්‍රියා සහ සංහාරයන් ද, සාමාන්‍යකරණය කළ දූෂණයන් ද, මත්ද්‍ර‍ව්‍ය, දුරාචාරයන් සහ පරමාදර්ශී මාදිලියක් සේ ජනතාව මත පටවා ඇති විගලිත පරිභෝජනභාවය ද ඔබේ දෑසින්ම දකින්නට ඔබට හැකි විය.

මෙම ශත වර්ෂය තුළ ස්වකීය ජනගහනය සිව් ගුණයකින් ඉහළ යනු මානව වර්ගයා විසින් දක්නා ලදි. සාධාරණය සඳහා වූ සා පිපාසාවෙන් පෙළෙන්නා වූ බිලියන සංඛ්‍යාත ජනතාවෝ ලොව සිටිති. මිනිසාගේ ආර්ථික සහ සමාජයීය ව්‍යසනයන් පිළිබඳ ලේඛනයන් නිමක් නොමැති ය. මේ බොහෝමයක් දෑ ශුද්ධ වූ පියතුමන්ගේ ස්ථිර හා වර්ධනය වන සැළකිල්ලට හේතු වී ඇති බව මම දනිමි.

ඔහුගේ කල්පනාවන් තුළ වන අනෙකුත් ගුණාංගයන් ඇගයීම සඳහා මට අවසර ලබාදෙන පෞද්ගලික අත්දැකීම් මා ලබා තිබේ. මාගේ ප්‍ර‍ථම උපාධිය ලබාගන්නා තෙක් මම කතෝලික පාසැලක ශිෂ්‍යයෙක් වීමි. යුදෙව්වෙකු, මුසල්මානුවෙකු, හින්දුවෙකු, බෞද්ධයෙකු, ආත්මවාදියෙකු හෝ වෙනත් ඕනෑම ආගමික විශ්වාසයක සාමාජිකයෙකු වීම වූ කලී, බරපතල හා ඒකාන්ත වශයෙන් දඬුවම් ලැබිය යුතු බිහිසුණු අයහපතකැයි එහිදී මට උගන්වනු ලැබුණි. ධනවත් හා වරප්‍ර‍සාදිත අයවළුන් සඳහා වූ එම පාසැල්වලදී මම ද ඉන් එක් අයෙක් වීමි. කළු ජාතික දරුවන් නැත්තේ මන්ද යන ප්‍ර‍ශ්නය එක් වතාවකට වඩා මා තුළ පැන නැඟුණි; මා වෙත සැපයුණු විශ්වාස නොකළ හැකි පිළිතුරු මට මේ තාක් අමතකව ගොස් නැත.

පසුකාලීන වසර වලදී, 23 වැනි ජුවාන් පාප්තුමා විසින් කැඳවන ලද දෙවන වතිකානු සභාව මෙම ඇතැම් සංවේදී කාරණාවන් විශ්ලේෂණය කිරීම පවරාගත්හ. ලෝකය පුරා ව්‍යාප්තව පවතින වැදගත් සහ බලපෑම් සහගත ලබ්ධීන් කෙරෙහි වන භක්තිවන්තයන් වෙත ගරුත්වය පෑමේ හැඟීම්, භාවිතාවට නැගීමට හා ඒ පිළිබඳ දේශනා කිරීමට ශුද්ධ වූ පියතුමන් විසින් ගනු ලබන ප්‍ර‍යත්නයන් පිළිබඳව අපි දනිමු. අදහන්නන්ට මෙන්ම නොඅදහන්නන්ට ද ගරුත්වය පෑම වූ කලී විප්ලවීය කියුබානුවන් විසින් සෙසු සහෝදර පුරවැසියන් තුළට කාවැද්දීමට උත්සාහ ගන්නා මූලික මූලධර්මයකි. එවැනි මූලධර්මයන් අපගේ ව්‍යවස්ථාවන් හා නීතින් මඟින් ද පැහැදිලි කොට කැපකර තිබේ.

යම්විටෙක එහි අඩු ලුහුඬුකම් මතු වී නම්, ඊට විප්ලවය දොස් ලැබිය යුතු නොවේ.

ලොව කිසිදු තැනක කවර හෝ ආගමකට අයත් කුමන පාසැලක හෝ යෞවනයන්ට එහි කළු, ස්වදේශික, කහ හෝ සුදු දරුවන් නැත්තේ මන්දැයි අසන්නට අවශ්‍යතාවයක් යළිත් පැන නොනගිනු ඇතැයි යන අපේක්ෂාව අප සිත් තුළ දැන් රැඳී තිබේ.

ශුද්ධ වූ පියතුමනි,

ගැලීලියෝ පිළිබඳව සහ කතෝලික පිරික්සුම් සභාවේ දැනුවත් වැරදි පිළිබඳව ද, කුරුස යුද්ධයේ ලේ වැකි පරිච්ඡේදයන් පිළිබඳව සහ ඇමරිකාවන් යටත් කිරීමේ දී සිදු කරන ලද සාපරාධයන් පිළිබඳව ද, අද වනවිට කිසිවෙකු විසින් සාවද්‍ය යැයි නොකියනා නමුත් අතීත අවධියේ දී බොහෝ අගතීන්ට හා පිළිකුලට ඉලක්ක වූ ඇතැම් විද්‍යාත්මක සොයාගැනීම් පිළිබඳව ද ඔබේ ධෛර්ය සම්පන්න ප්‍ර‍කාශයන් මම අවංකවම අගය කරමි. එවැනි පුකාශයන් කිරීමට, ඔබේ පල්ලිය තුළින් ඔබ අත්කරගෙන ඇති ආකාරයේ සුවිශාල අධිකාරයක් සැබැවින්ම ඒ සඳහා අවශ්‍ය වේ. 

කියුබාවේ අපට ඔබ වෙනුවෙන් පිරිනැමිය හැක්කේ කුමක්ද?

අවම අසමානතාවන්ට මුහුණ දෙන ජනතාවක් හා අසරණභාවයට පත් පුරවැසියන් අඩුම සංඛ්‍යාවක් ද, පාසැල් රහිත ළමුන් අඩුම ප්‍ර‍මාණයක් ද, රෝහල් රහිත රෝගීන් අඩුම ප්‍ර‍මාණයක් ද, ශුද්ධ වූ පියතුමන් ලොව සංචාරය කරන ලද අන් ඕනෑම රටකට වඩා ජනගහණයට සාපේක්ෂව වැඩිම ගුරුවරුන් සහ වෛද්‍යවරුන් ප්‍ර‍මාණයක් ද, කුශලතාවය සහ උසස් දේශපාලන සංස්කෘතිය පිළිබඳ ප්‍ර‍බල අවබෝධයත්, තම අදහස් කෙරෙහි වන පරම විශ්වාසය පිළිබඳ ස්ථිරසාර භාවයත් ඇතුව, පරිසමාප්තවූ නිදහසින් ඔබට කතා කළ හැකිවූත්, සකළවිධ නිසි ගරුත්වයෙන් හා සවිඥාණයෙන් යුතුව ඔබට සවන් දෙන්නා වූත් උගත් ජනතාවක් ද අපි ඔබට ප්‍ර‍දානය කරමු.

ඔබේ භාග්‍යවත් අදහස තේරුම්ගැනීම සඳහා මෙතරම් හොඳින් පිළියෙල කළ අන් රටක් තවත් නම් ඔබට හමු නොවනු ඇත; එනම්, ධනය හා සහයෝගීතාව සමානව බෙදීයාම ගෝලීයකරණය කිරීම පිළිබඳ අදහසයි.

© JDS

left

Journalists for Democracy in Sri Lanka

  • ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS), ලොව පුරා ජනමාධ්‍යවේදීන්ගේ අයිතීන් සුරැකීමට කැප වූ 'දේශසීමා රහිත වාර්තාකරුවෝ' සංවිධානයේ ශ්‍රී ලාංකික හවුල්කාර පාර්ශ්වයයි.