JDS Sinhala

රෝගී මිනිසෙකු සමඟ අනුරාගීව

කැනේඩියානු ප්‍රවීණ කවියෙකු වන Barry Dempster ගේ “The Burning Alphabet” (Brick Books, 2005) නම් වූ කවි පොතෙහි පළවූ “Making Love to a Sick Man” කවියෙහි අනුවාදයකි. 


පරිවර්තනය: මහේෂ් මුණසිංහ


රෝ

ගී මිනිසෙකු සමඟ
ශෘංගාර රංගනයකට පෙර
ඔබ පළමුව කළ යුත්තේ
ඔහුගේ නාස්පුඬු අග
කුඩා කණ්ණාඩියක් තබා
ඒ මත වාෂ්ප පටලයක් දැවටේදැයි
සෝදිසියෙන් බලා සිටීමයි.
ඔහු සජීවී සහ සූදානම් නම්
ඔබේ අතැඟිලි තුඩගින්
හදවතක සලකුණක්
එහි අඳිණු හැකිවිය යුතුය.

රෝගයේ තොරතුරුපත
අනුගමනය කරන්න.
හුස්ම ගැනීමේ වේගය වැඩිවුවහොත්
කඩදාසි බෑගයක් උවමනා විය හැක.
අවැසි නම් කොන්ඩමයක් පළඳවා හෝ
අඩි දහයක් වුණත් ඈතින් සිට හෝ
ඔබට හැකි ඕනෑ ම අයුරකින්
ආරක්ෂාවෙන්න.
යම් හෙයකින්
ලාලසාව
ඔහුගේ උදාසීන සිතිවිල්ලක් මුදාහළහොත්
පුළුන් ඇබ දෙසවනෙහි සිරකරගෙන තිබීම
වඩාත් සුදුසුය.

කෙසේ නමුත්
මතුපිට දෑ සියල්ල විඳින්න.
රෝගී මිනිසෙකුගේ සම
අතිශයින්ම සුමුදුය.
සීනිමොටයි ලොවිනවා සේ
ඔහුගේ අකු ඇටයෙහි
ඔබෙ දෙතොල සඟවන්න.
කබ පිරුණු ඇහි පිහාටු අස්සෙහි
ඔබගේ තනපුඬු ගිල්වන්න.
ඔහුගේ
පුරුෂ නිමිත්ත පවා
නිල්පාට විල්ලුද ඇසුරුමක සැඟවූ
වාසනාවන්ත පළිඟු මිණක් මෙන්
සුමුදුය.

පරමෝත්කර්ෂයේ දී, ඔබ එන්න–
ජැටියෙන් නැවට ගොඩවුණු පාලම
ඉහළට ඔසවන ජවයෙන් හෝ
තටු සඟලක් පැළඳ පාවි පාවී හෝ
ලොව වටා සැරිසරන්නට
පිටත්වෙනවා මෙන්.

ඔබගේ නීරෝගී රාජධානිය වෙත
නැවත පිටත්වීමට පෙර
ඇඳුමෙහි සැන පියැවිය වසද්දී,
සේද සළුවක් මෙන් හාන්සිව
එදෙස බලා සිටින රෝගී මිනිසෙකුට
යෑම් සහ ඊම් යනු
සමානාර්ථ පදයන්ය.
ඔහුගේ සයනයට ප්‍රත්‍යන්ත සියල්ල
නික්මයෑමකි.
එබැවින්
එය නාට්‍යාකාරව
මතකයේ රැ‍ඳෙන සේ සිදුකරන්න.
අතර ඉඩ දවාලන
ධූමකේතුවක් වන් හාදුවක්
පාකර එවන්න –
විශ්වයේ විදුලි රේඛාවක්
ඔහුගේ දෑස් තුළ දැල්වෙන්නට.

 

බැරී ඩෙම්ස්ටර්


© JDS

සිතුවම: ප්‍රංශ සිතුවම් ශිල්පි Théodore Géricaultගේ Portrait of the engraver Francois Godefroy

left

Journalists for Democracy in Sri Lanka

  • ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS), ලොව පුරා ජනමාධ්‍යවේදීන්ගේ අයිතීන් සුරැකීමට කැප වූ 'දේශසීමා රහිත වාර්තාකරුවෝ' සංවිධානයේ ශ්‍රී ලාංකික හවුල්කාර පාර්ශ්වයයි.