JDS Sinhala

අසිරිමත් උදෑසන

කො

ළ හැලුණු ඉති අග
මල් පුබුදුවනු බැරි වුව
ඉපල් සෙවණක් වුවද සෑහේ
ඉරි තැළුණු බිම මත
ළා දලු පුබුදුවන්නට...

අනෝරා වැසි වැස
සූරා මහපොළෝ හදවත
උදුරා රැගෙන ගිය සාරය
රැකගෙන හිඳී ඈ
සඟවා කලල් අතරෙහි...

සිඳුණු වෑ පිටියෙහි
පැළිවළං පැළී ගිය ළය මත
කැටි කොටැ නිදන් කර
මළා සේ වැතිරී හිඳී ඈ...

දරාගෙන සැඩ තාප
අහසට යවා දිය බිඳු
වලාකුළු සමඟ රහසේ
මන්ත්‍රණ කරයි ඈ
අනෝරා වැසි නොව
පොද වැසි රැගෙන එන ලෙස...

ඉවුරේ හිඳී ඔහු
ඉපල් සේ වෙස්වළාගෙන
පපුතුරෙහි දරා ජීවය...

අඳුරෙහි වැටුණු පොද වැහි
දැනෙන නොදැනෙන පදමට
කොඳුරා රහස් පණිවුඩ
අවදිකරවයි ජීව අංකුර

ඉපල් සෙවණක් වුවද සෑහේ
ඉරි තැළුණු බිම් මත
ළා දලු පුබුදුවන්නට...

දවසක උදෑසන
හරිත තණ පලස මත
දහසක් මල් පිපී ඇත!
පමා වී අවදි වූ ලොව
දසතින් නැඟේ පිළිරැව්
"කිමද මේ එක රැයෙක අසිරිය..!"

මඳ සිනා නඟයි ඈ
මඳ සිනා නඟයි ඔහු...!

 

ජයසිරි ජයසේකර


© JDS


left

Journalists for Democracy in Sri Lanka

  • ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS), ලොව පුරා ජනමාධ්‍යවේදීන්ගේ අයිතීන් සුරැකීමට කැප වූ 'දේශසීමා රහිත වාර්තාකරුවෝ' සංවිධානයේ ශ්‍රී ලාංකික හවුල්කාර පාර්ශ්වයයි.