සුදු ඉරක මුණිවත
- Post 06 November 2018
තාර පාරක සුදු ඉරක් යට
කතන්දර සඟවා තබා ඇත
අලස ලෙස දිග ඇදී උන්නට
කල්පනාවන් සිය ගණන් ඇත
පුට් බයිසිකල් ත්‍රීවීල් සිට
ටෙන් වීල් දක්වා සියල්ලෙම
කට්ට ගෙවෙනා බවක් දුටුවම
හිතා ගන්නැති නිහඬ වන්නට
දහස් ගණනක යටිපතුල් ගැන
පාවහන් වහගත් කතන්දර
කිසිම කෙනෙකුට කියා නැත තව
ඇහැව්වත් නොකියාවි කිසි දින
බ්‍රේක් පාරක ගර්ජනාවෙන්
වෙව්ලනවා ඇති සෑම මොහොතෙම
හෝන් එකකින් කරන තර්ජන
නින්ද බිඳ ඇති බොහෝ රැයවල
ආර්ඩීඒ කරන වෙනසට
එකඟ නැතිමුත් මුණිවතින්ම ය
ලංගමය මෙන් රතට නොහැරී
කසාවත වුව සුදු කරන් ඇත
චණ්ඩ හිරු යට සඳ සිසිල යට
පහන් කණුවක මඳ එළිය යට
කඳුළු නොසලා සිනහ සඟවා
කඩින් කඩ නෙත් පියයි සුදු ඉර
චලක ප්‍රමුදිත ලුණුවිලගේ
© JDS
