පාර්ටිසාන් ගීතය
- Last Updated on 22 November 2016
ලෙනාර්ඩ් කොහෙන් (1934 - 2016)
1934 දී කැනඩාවේ උපත ලද ලෙනාර්ඩ් කොහෙන් 2016 නොවැම්බර් 7 දින මිය ගියේය. ඒ දශක අට තුළ ගීත රචකයෙකු, කවියෙකු, ගායකයෙකු සහ නවකතාකරුවෙකු ලෙස විශිෂ්ට නිර්මාණ රැසක් හේ ශේෂ කොට තබා ගියේය. ඔහුගේ දෙමව්පියන් ඕර්තෝඩොක්ස් යුදෙව්වන් විය. The Partisan නම් මෙම නිර්මාණය දෙවන ලෝක යුද්ධයේ දී නාසි ආක්‍රමණයට එරෙහිව සටන්වැදුණු පෝලන්ත පාර්ටිසාන් ව්‍යාපාරයේ ගීතයක් පදනම් කරගෙන ලියැවී තිබේ. 1986 දී නිකුත් වූ ඔහුගේ First we take Manhatten නම් ගීතය දැඩි ලෙස ජනප්‍රිය වූත් විවාදාත්මක වූත් නිර්මාණයකි.
පරිවර්තනය: අජිත් සී. හේරත්
ඔවුහු දේශසීමා බිඳිමින් කඩා වදින විට
මා හට යටත්වනවන ලෙස අනතුරු ඇඟවිණි
මට එය කළ නොහැකිය
මම මගේ තුවක්කුව ගෙන අතුරුදන් වීමි.
මම නිරතුරුව මගේ නම වෙනස්කළෙමි
මට මගේ බිරිඳ සහ දරුවන් අහිමි විය
මට සගයන් රැසක් විය
ඇතැමුන් තාමත් මා සමග ය
වියපත් මවක් අප හට නවාතැන්දී
අප සඟවා රැකගත්තාය
හමුදාව පැමිණිවිට
ඇය වදනකුදු නොදොඩා
මරණයට මුහුණ දුන්නාය.
උදෑසන දී අප තිදෙනෙකු විය
සවස දී ඉතුරුවූයේ මා පමණි.
එහෙත් මා යා යුතු ය
දේශසීමාව මාගේ සිර ගෙයයි.
අහෝ මඳ නළ! එය හමා යයි!
සොහොන් සිපගෙන එය හමා යයි.
රමණීය නිදහස!
එය ඉක්මණින් ළඟාවනු ඇත
එවිට අප සෙවණැලි අතරින්
මතුවන්නෙමු
ලෙනාර්ඩ් කොහෙන්
© JDS
