JDS Sinhala

මෝදක සරත්

 

ළන්දාරී හැන්දෑවේ
පොල් මෝලේ කොප්පරා සුවඳ හා සීනුව
අවසාන කණිසමට කෑ ගසයි
ටියුබ් ගෙවුන සයිකලේ පාගා ඉගිල යයි
මිටින් හල ගිනි කුරැල්ලෙකු ලෙස සරත් ටවුමට

නවතා සයිකලය
බලා වටපිට රිංගයි
බෙහෙත් බඩු කඩයේ අඳුරු අහුමුල්ලට
සීයේ කොළයේ හිලව්වට
පරණ පත්තර පිටුවක ඔතා දුන්
මෝදක දෙකෙන් එකක් හවසට
අනික උදයට

තලා පොඩි කර එතනම
දමා තල්ලේ විඳී ඉමිහිරි ජීවිතේ රස
පදී නිසලව පැල් කොටය වෙත
මද සුළං රැළි තුරුල් කරගෙන ටිකෙන් ටික
සමවදී තව්තිසා සිහිනයට
කටේ කෙල හිඳගෙන පත්තු කරගෙන තෝර බීඩිය
වචනයෙන් කිව නොහැකි මදහසක් පුරෝගෙන

ඊළඟ නැවතුම හන්දියේ කඩය!
දමා තැටිපාන් සිලි උරයට
හලා භූමිතෙල් බගෙ බෝතලයට
පොඩි ඌට සීනි බෝල උඩ සාක්කුවට
බිරිඳට සන්සිල්ක් ෂැම්පුද
සරත්ට??
සරත්ට විස්සක බීඩි

අඩවල් දොර පියන ඇරගෙන
දුව ඇවිත් එල්ලෙයි පොඩි ඌ අත්වල සුවඳ
බිරිඳ දුන් වැඩි සීනී ප්ලේටියෙන්
තවත් ඈතට ගෙනයයි බමන සිත

නිදිකරවා පොඩි ඌ කාමරයේ
එලයි පන්පැදුර කටුක බිම මත
රිදුම් පිරිමදින්නට
නිවා බීඩිය අවුලවා ආදරය
හේතුවෙයි සරම ලිහිල් කොට
පුරුදු එකම මිෂනාරි ඉරියව්වට
බිරිඳත් කැමති ඒකට

එක්ව තැනූ ජීවිතේ දෙදෙනාම එකට යාත්‍රාකරයි
ඉහලට පහලට බොහෝ වේලා ගෙරෙව් මුත්
ස්තම්භිත වැහි පොද
බැරිම තැන නැවතුවා ඇති අදට කියා
කළු ගැසුන තොල්පෙති තබා ඇගෙ නලළත
ඇලවීය සරම දෙදෙනාම පොරෝගෙන

සරත් මේ සරත් සමයයි ආදරේ
වරක් පමණක් උදාවෙන වසන්තේ
බරක් සඟවාන වේදනා පපුතුරේ
‍යළිත් යා යුතුය
පලක් නෑ ශෝක වී සුමිතුරේ
දහසක් ලිප් මෙලවෙන උදෑසන
යා යුතුය නුඹ
ජීවිතේ


ගිම්හාන් හිරණ්‍ය


© JDS


left

Journalists for Democracy in Sri Lanka

  • ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS), ලොව පුරා ජනමාධ්‍යවේදීන්ගේ අයිතීන් සුරැකීමට කැප වූ 'දේශසීමා රහිත වාර්තාකරුවෝ' සංවිධානයේ ශ්‍රී ලාංකික හවුල්කාර පාර්ශ්වයයි.