JDS Sinhala

දෙව්දුවකගේ සිහිනය

දශකයෙන් දශකය අනවරත පීඩනයේ රුදු සැමිටියෙන් තැලුම් කෑ ස්වකීය ජනයාගේ ඉතිහාසය වෙනස් ලෙස ලියනු වස් සිය යෞවන දිවිය කැප කළ සුබ්‍රමනියම් සිවකාමී හෙවත් කර්නල් තමිලිනී ඔක්තෝබර් 18 වැනිදා අලුයම් පාන්දර සිය කෙටි දිවිමඟ හැර නික්ම ගියාය. යුක්තිගරුක ජීවිතයක් පිළිබඳ නොතිත් වූ අදිටනින් මොළවාලන ලද අභිලාෂයන් මරණය තෙක්ම ඇය සුරැකි බවට, සිය දිවියේ අවසාන භාගයේදී ඈ විසින් ලියනා ලද නිර්මාණාත්මක ලිපි ලේඛන දෙස්  දෙයි. සිය මරණයට පස් මාසයකට පෙර හය වැනි 'මුල්ලිවෛක්කාල් සැමරුම' යෙදුණු මේ වසරේ මැයි මාසයේ දී 'ஒரு தேவதையின் கனவு' මැයෙන් ඇය විසින් ලියන ලද කව සිංහලට නඟා මෙහි පළ කරනුයේ, මේ නොවැම්බරයේදීත් සැමරෙන ඇය වැනි සිය දහසක් දෙනා පිළිබඳ මතකය වෙනුවෙනි.

පරිවර්තනය - අජිත් සී. හේරත් 


 

ගිල්වමින්  දේදුනු තුළ
පැහැගන්වන්නීය ඈ
සිය සියුම් සිතුවිළි කෙඳිති හුය
වියනු වස් දහසක් සිහින

සුනු කර ඇද හැලෙන හිරු කැලුම්
මුසු කර  දිලෙන රන්දූලියේ
සිතුවම් කරන්නී ඈ
නේක මල් රටාවන්
සේද සළුපිළි මත

නෙළා තරු කැට
විසිතුරු කරන්නී ඈ මහත් ඇල්මෙන්
රන්හුයෙන් නිමි පුළුල් වාටිය..
අමුණන්නීය ඈ මුතුහර
ඇදහැලෙන සාරි පොට මත

ප්‍රමුදිතව ඈ සොම්නසින්
වේලනු පිණිස ඇගේ සළුපිළි
ඇතිරුවා වළාකුළු මත

බලය සහ කාමුක බවේ
පිසාචයෝ පැමිණ
කෙලෙසුවෝ මිනිසත් බව
ඔවුන්ගේ ගරුත්වය රැකි
අවසාන වැරැහැළි ඉරා විසිකර

දරාගත නොහැකිව
තමන්ගේ නිරුවත‍
නළලට ගසාගනිමින්
සමාජය කෑ ගසා වැළපුණි

එසේ වුව හැමදාම මෙන්
අහුලමින් සිටින්නී ඈ
ක්‍ෂිතිජඉම විසිරි පැහැයන්
සිතුවම් කරනු වස්  ඇගේ සිහිනය

 

තමිලිනී ජයකුමාරන් | 2015 මැයි


© JDS


left

Journalists for Democracy in Sri Lanka

  • ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS), ලොව පුරා ජනමාධ්‍යවේදීන්ගේ අයිතීන් සුරැකීමට කැප වූ 'දේශසීමා රහිත වාර්තාකරුවෝ' සංවිධානයේ ශ්‍රී ලාංකික හවුල්කාර පාර්ශ්වයයි.