JDS Sinhala

පරාජිතයන්ගේ ගීතය

දෙමළ කිවියර වඅයිස ජයපාලන් විසින් 'தோற்று போனவர்களின் பாடல்' මැයෙන් යුතු මුල් කව ලියන ලද්දේ මුල්ලිවෛක්කාල් සංහාරයෙන් සය මසක් ගෙවුණු 2009 නොවැම්බරයේදී ය. පසුව ඉන්දීය ලේඛිකා මීනා කන්දසාමි විසින් එය Song of the Defeated මැයෙන් ඉංග්‍රීසියට නඟන ලදුව 2010 දී ප්‍රකාශයට පත් කළ Waking is Another Dream: Poems on the Genocide in Eelam කවි එකතුවෙහි මුල්වරට පළ කෙරුණි. එම ඉංග්‍රීසි පරිවර්තනය, 2013 මැයි මාසයේ දී JDS ඉංග්‍රීසි වෙබ් අඩවියෙහි පළ විය. 

පරිවර්තනය: අජිත් සී. හේරත්



විජයග්‍රාහකයාගේ ගීතය
දසතින්  නැගී එයි.
එහි උත්කර්ෂය කෙළ පිඩක් මෙන්
අප මුහුණු මත පතිත වෙයි.
එහෙත් ඔවුහු තාමත් භීතියෙනි.
මක් නිසාද යත් යුක්ති සහගත බවේ සන්නාහය
ඔවුන් සතුව නොමැති බැවිනි.

ගිනිබත් තණබිමක
අළුයටින්  මෝදුවන ළපළු බඳු
අපේ ම ගීත අප හට ද ඇත
විජයග්‍රාහකයෝ ඒවා විළාපයන් ලෙස හඳුන්වනමුත්
අපගේ ගීත වෙස් ගත් ගරිල්ලන් වෙත්.

සියළු වීර කාව්‍යයන්පැන නැගෙනුයේ
ශෝකී වැළපුම් තුළිනි
ඒවායින් කියැවෙන පරිදි
අධිපතියන්ගේ කෘෘරත්වය හේතුවෙන්
උපදින කඳුළු ගංගාවන් විසින්
ඔවුන්ගේ යස ඉසුරු මාළිගා සෝදාහරිනු අැත.

විජයග්‍රාහකයෝ දැන්
නිදහසේ ඇටකටු වීසිකරමින්
සව්දිය පුරති.
ඔවුන්ගේ බීමත්කම සහ කාමුක බව
අප  බියගන්වයි.

රැයෙහිදී ඔවුහු පැමිණ
අනාථ කඳවුරු වෙතින්
දෙමළ ගැහැණුන් පැහැරගෙන යති,
ප්‍රශ්න කරනු වස්.

මහ සයුර මැදදී ඔවුහු
ඉන්දීය දෙමළුන්ට වෙඩි තබති
හුදු ප්‍රේක්ෂණය සඳහාම.

අපි ආත්ම සංයමය තෝරා ගතිමු.
නව හිස් ඇත්තා රාවණා නොවේ
මුහුණු පහක් යනු මුරුගා නොවේ
තුන් හිස් ඇත්තා කිසිකලක බ්‍රහ්මයා නොවීය.

අපි හිස් බොහෝ ඇති අර්ධනාරිශ්වර වෙමු
අර්ධ ස්ත්‍රී, අර්ධ පුරුෂ
උතුරු සහ නැගෙනහිර දෙතැනම
බොහෝ මුහුණු ඇති.
එක් මුහුණක හෝ අඩුවක් විසින්
ඒ අප බවට පත්වීම වළකාළයි.
ඒ තෝරාගැනීමක් වුව ද
අත්වැරදීමක් ලෙස කෙළවර  වනු ඇත.

නිදහස් වූ ,
අපගේ ජනතාව
සහ පුත්තලමට පළවා හරින ලද
අපගේ සහෝදර මුසල්මානුවන්
යළි පැමිණිය යුතුය නිවෙස් වෙත,
නව යුගයකට උපත දෙනු වස්.

2

ජයග්‍රාහකයාගේ ජය ගී හඬ
දැන් කෙමෙන් දුර්වල වෙයි.
මක්නිසාද යත් අයුක්තිය වූ කලී වසංගතයක් බැවිනි.
අපගෙන් උදුරාගත හැකි වූ හැම දෙයම ගිල දැමූ ඔවුහු
දැන් එකිනෙකා කා ගනු ඇත.

කාලය විසින් කහකුඩු කුංකුම බවට පෙරළන පරිදි
ස්වයං විවේචනය විසින් පරාජය ඔසුවක් බවට පෙරළනු ඇත.
අපගේ නිශ්ක්‍රීයත්වය වුව ද වේදනාවන්ට ඔසුවක් වනු ඇත.
අප දන්නා එකම පිළියම එයයි.
මක් නිසාද යත්
ස්වයං විවේචනය පරාජය වෙත ආශ්චර්යයන් ගෙන එනු ඇති බැවිනි.
එවිට අප අප වටාම ඉදිකරගත් තාප්ප
විසින් සතුරා වටලනු ඇත.

අපි අහස වෙත සංක්‍රමණය වූයෙමු.
සංග්‍රාම බිම ඇත්තේ මහපොළොවේ ය.
බූද්ධියේ බලකොටු සෑම විටෙකම
මහපොලොව මත බිහි වී
අහස වෙත නැගෙයි.

පරාජිතයෝ සිය ජන දේවතාවන්
ලේ සහ මඩ අතර සොයති.
ඔවුනට කරුප්පුසාමි, කාතවරායන්, මධුරෙයි වීරන් වැනි වූ
මුල්ලිවෛක්කාල්හි තාරුකාව තීපන් හමු වනු ඇත.
මේ නව දෙව් පෙළපතක යුගයයි
දුෂණයට ලක් වූ අපගේ ස්ත්‍රීන්ගේ කෝපය
බිහිසුණු දේවතාවියන් ලෙස යළි උපදිනු ඇත.

ගින්නෙන් වැනැසි වනයක
යළි නැගෙන දළු මෙනි.
මා ගීය ගැයෙනුයේ මුදු ලෙස ය.
මන්ද, අප පළමුව නිවෙස් වෙත යා යුතු බැවිනි
අප අපගේ නිවෙසට ළඟා විය යුතු ය.

3

අපි දැවුණු වනයක් වෙමු
එහෙත් අපගේ ගීත නොනැවතී ගැයෙනු ඇත.
ශේෂ මුල් තුළින් පැන නැගින
අපගේ ගීතයන් නොනැවතී ගැයෙනු ඇත.
මළවුන්ගේ වෙනුවෙන් ගැයෙන ශෝකී ගීතයන් ලෙස
මං මුළාවුන්ට කෙරෙන හඬගැසීමක් ලෙස
අපගේ නිවෙස ඉල්ලා නැගෙන මුරගෑමක් ලෙස.
නැවත නැවතත්.
දිවමන් සිහිනයක්
නිදහස පිළිබඳ අභිලාෂයක් ලෙස.
අනාගත විවේචකයන් ඇතැම්විට සොයාගනු ඇත
මේ හුදෙක් මවිසින් පමණක් ගැයෙන ගීතයක් නොවන බව.‍
නිහඬ වෙව, නොපවසව.

වියන්නෙමි මම මගේ ගීතය,
සොරාගත් ගීතයන්ගෙන්
තේම්ස් ගං  ඉවුරේ
වසන්තය උදෙසා සිහින දකින
නග්න චෙරි ගස්වලින්.

4

නෙැවැළපෙනු, මා ආදරණ්‍ීය මාතෘ භූමිය

උතුර සහ නැගෙනහිර  ලෙස
ඔබව ඉරා දමා ඇත.
එය රකිනු වස් මියගිය අපගේ ස්ත්‍රීහූ
ගී ගයමින් නටන
සිංහල සොල්දාදුවන් විසින් වියරුවෙන් කෙලෙසනු ලැබූව ද
බිඳී විසිරී නොයනු මැන,
මේ රුදුරු දිනයේ දී වුව
ගයනු මැන එනමුත් හෙට දිවියේ යුද ගීය.
ගයනු මැන ගීතය
දැවුණු මුල් වලට ඕජාව ගෙන එන.

කිසි දු ගින්නක් නිම නොවනු ඇත
අප උතුම් මුතුන් මිත්තන්ගේ ඇටකටු මත.
එහෙයින්, මේ කළු අළු දිනය වෙනුවෙන්
ගයව සමනළුන්ගේ ගීතය
නිශා ගී ගයන දළුපත්
ඉන්ද්‍රචාපා බවට පෙරලෙන

අප නෑ සියන්ගේගේ වැළපුම් හඬ
කෙමෙන් නෑසී යන විට,
ඇසේ දිවමන් මියැසියක හඬ
සගයන්ගේ බෙර මද්දලින් නැග එන.

මවුනි!
සතුටින් පිරි  දිනෙක
පියාණන් හා නුඹ  මැවූයේ මා
ඊලාමයේ පස සහ දිය
ආදරය සහ මුසු කොට.
දැන් මම,
මා මැවූ ඒ පංච මූලයෝ එක්කොට
ඔබ වෙනුවෙන් විසල් බලකොටුවක් තනාලමි.
ඔබ හට පහර දුන් දෙපා වෙත
සාප කළ නොහැකි නම් මට
මේ ගීතයෙන් ඇති ඵලය කිම?

5

මීයන් දඩයමේ ගිය
නළාකරුවාගේ කතාවේ එන,
එහි සියළු දරුවන් අහිමි වූ
හාමලින් නගරයේ වැළපුම
දෝංකාරය දෙයි සෑම තැන මගේ මවුබිම.
නොසැලෙන මහද වුව බිඳී යයි.

කුමක් වනු ඇත් ද
අසරණ බවට පත්කළ ජනයාගේ කඳුළුවල කෙළවර?
කුමක් ශේෂ ව ඇත් ද
පිබිදෙමින් ආ විමුක්තියේ සිහිනය හැර?

බිහිවනුයේ ජාතීන් අද දින
පැරණි අදිරද නටබුන් මතය.
සියවස් ගණන් පවතින සීමා
එහෙයින් කොහේවත් නැත.

අනාගත ජාතීන් උපත ලබනුයේ
මේ ඇතැම් ජාතීන්ගේ සොහොන් මතිනි.

තමන්ගේම ජනයා ගොඩබිමේදී සහ  මුහුදේදී
දඩයම් කරන ජාතීන්ගේ සාපයට ලක්වූවන් විසින්
සාප කරනු ඇත ජාතින් වෙත වීණා වයන
ඔවුනගේ ජනයාද ගොඩබිමේ සහ මුහුදේ දී ද දැවී යන ලෙස.

අද වුවද නුඹලා සිතනු ඇත
නුඹලා සුරක්‍ෂිත යැයි කියා.
එහෙත් හෙට සාගිනි රතු අවතාර
නැගෙනු ඇත ඉන්දීය සාගරය සහ  හා එහි වෙරළ මත.
සාප කරනු ඇත සතුරන් බෝ කරනවුන් වෙත,
ඔවුන් වටා වන සියළු දෙනා වෙත,
කුඩා මිනිසුන් නොසළකා හැර.
ඔවුහු ගලිවර් මෙනි,
බියපත් ලිලිපුට්ටන් විසින් බැඳ දමන ලද.

6

යුක්තියෙන් තොර වූ ජයග්‍රහණයක් වෙනුවෙන්
සවුදිය පුරන නිවෙස් තුළ හෙට දින විලාපය නැගෙනු ඇත.
සාමයේ පරෙවියන් වැළපෙන, මිනිසුන් මරා දැමුණ මංමාවත් මත
හෙට දින උත්සව පැවැත්වෙනු ඇත.

මගේ දෑස් ගිනියම් වානේ මෙන් රත් පැහැ ගැන්වේ.
මාගේ ශාපයේ ගීතය ගයනු වස්
මම මෙහි පැමිණියෙම්
මේ වූ කලී විනාශයේ රංගනයයි
වෙස් මුහුණු හෝ අංග රචනා රහිත වූ.

දිවුරා ශපථ කර
මම මේ ශාපයේ ගීතය ගයමි,
දෙමලෙන් සහ මගේ කවි මගින්.
සම්මුතියකට ඉඩක් නැති මා දකින  සත්‍යයේ නාමෙන්‍
ශාප කරනෙමි මම.
මාගේ ජනයාගේ ලේ වලින්
නුඹලාගේ දෑත් සහ මනස පොඟවාගත් සියල්ලනි,
විපතක් ම  වේවා තොප හට!
යුක්තියේ බල ඇණිය,
පිළිගනුව මා යුද බිමේ පරිත්‍යාගයක් ලෙස!

යුක්තියේ දෙවිවරුනි,
මම ඔබ වෙනුවෙන් බැති ගී ගයන්නෙමි.
ඔබ හමුවෙ මා සිරස නමන්නෙමි.
කිසි දිනෙක මා සිරස නොනැමුවද
සතුරා හෝ සටන්කාමීන් අභියස.
දඬුවම් ලබා දෙනු මැන ජන සංහාරයට එරෙහිව,
ඝාතකයන්ට එරෙහිව,
හිංසනය නොවැළක්වූවන් වෙත,
හිංසනය වළක්වනු වස් උත්සාහ දැරූවන් වැළැක්වූවන් වෙත.
යුක්තියේ ආගමනයට ඉඩ හළ මැන
අවසන් විනාශයේ ගිනි දළු ලෙස.

7

මහී මාතාවුනි!
නොවැළපෙනු මැන
අපගේ ඉතිහාසය වැලි මාළිගාවක් නොවේ
මුල්ලිවෛක්කාල්හිදි සෝදා යැවිය හැකි.
එය ගොඩනැගුනේ උතුරු නැගෙනහිර ජනයාගේ
ජීවමාන අපේක්ෂාවන් තුළිනි.
එය ඔවුන්ගේ නොනිමි සිහිනයයි.

සත් සමුදුරු හරහා
දෙමළ ජනයා ඔබේ හඬගෑමට අවදි වී අැත
අවසාන දෙමළාගේ සිහිනය ද
ඔබ විමුක්තිය වේ.
මාතාවුනි!

 

ව අයි ස ජයපාලන්


© JDS



left

Journalists for Democracy in Sri Lanka

  • ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS), ලොව පුරා ජනමාධ්‍යවේදීන්ගේ අයිතීන් සුරැකීමට කැප වූ 'දේශසීමා රහිත වාර්තාකරුවෝ' සංවිධානයේ ශ්‍රී ලාංකික හවුල්කාර පාර්ශ්වයයි.