’83 ජූලි: ‘දැන් කළ හැක්කේ මනුෂ්‍යත්වය යළි එන තෙක් බලා හිඳීම පමණි’
- Post 28 July 2015
මෙම ලිපියේ පළමු කොටස කියවීමට: ‘ගිනිබත් නගර වීදි ඔස්සේ විනාශය නරඹමින් මම ඇවිද ගියෙමි’
තිලක්’ හා UC යන අනවර්ථ නාමයන්ගෙන් 1983 කළු ජූලි සමයේ ලියන ලද සටහන් පෙළක පළමු කොටස මෙයට කලින් පළ විය. මේ එහි දෙවැනි සහ අවසාන කොටසයි. ලන්ඩනයේ ප්‍රකාශයට පත්කළ ’ටැමිල් ටෛම්ස්’ සඟරාවේ ඉංග්‍රීසි බසින් පළ කරන ලද මෙය බොහෝ විට දකුණේ ජීවත් වූ සිංහල වාමාංශිකයෙකු විසින් යවන ලද අවිධිමත් වාර්තා හා තොරතුරුවල සම්පිණ්ඩනයක් සේ පෙනී යයි.
ජූලි 24 වැනිදා සිට 27 වැනිදා දක්වා කාලය තුළ කොළඹ සහ මහනුවර ප්‍රදේශවල සැරිසරමින් රැස් කරගත් තොරතුරු මැදි කොට ලියූ මෙම ලිපි පෙළ, ‘කළු ජූලිය’ පිළිබඳ ඉකුත් තිස් දෙවසරක කාලය තුළ සිංහල සමාජය විසින් තනා අදහන ප්‍රබන්ධ සරල ලෙස ඒවායේ පනදමින්ම බිඳ දමයි. ‘යූඇන්පී කාරයන් අතළොස්සකගේ’ කුමන්ත්‍රණයක් ලෙස දැන් වෙස් ගන්වා ඇති වර්ග නාශක කැරැල්ලක් සඳහා සාමාන්‍ය පොදුජනයාගේ සක්‍රීය සහ නිශ්ක්‍රීය හවුල්කාරීත්වය කෙතරම් වීද යන්න ගැන සාපරාධී තිත්ත ඇත්ත මෙමගින් නිර්දය ලෙස නිරාවරණය කරයි.
පරිවර්තනය: භාෂණ අබේවර්ධන
ජූ ලි මාසයේ 24 වැනිදා රාත්‍රියේ ආරම්භ වූ ජන සංහාරය පිළිබඳ මම ඔබට මීට කලින් වාර්තාවක් එවා ඇත්තෙමි. ඒ වාර්තාව වැඩි වශයෙන් අදාළ වන්නේ 25 සහ 26 වැනිදාට ය. එය වඩාත් යාවත්කාලීන කරනු වස් මේ වනවිට මා දන්නා අවශේෂ තොරතුරු ද ඊට එක් කරන්නට මම කැමැත්තෙමි.
ආණ්ඩුව විසින් පනවන ලද ඇඳීරි නීතිය 25 වැනි සඳුදා සවස දෙකේ සිට 26 වැනිදා මුළු දවසම බල පැවැත්වෙන සේ දීර්ඝ කරනු ලැබිණ. නමුත් මැරයන්ගේ ක්‍රියා කලාපයන් කෙරෙහි ඇඳිරි නීතිය කිසිදු බලපෑමක් නොකරන ලද්දේ හමුදාවන් විසින් ප්‍රචණ්ඩ ක්‍රියාවන්ට මිනිසුන් දිරි ගන්වන ලද හෙයිනි. ගිනි තැබීම් නිර්බාධිතව සිදු වූ අතර කුඩා නිවෙස් පවා ප්‍රහාරයන්ට ගොදුරු විය. ඒ නිවැසියන්ගේ සියළු සන්තකය එක්කෝ ප්‍රහාරකයන් විසින් කොල්ල කන ලදී - නැතහොත් ගිනි තබා විනාශ කැරිණ. රාත්‍රී 11ට පමණ පැමිණි පොලිස් භටයන්, පෙරළා සිය නිවෙස්වලට යන මෙන් ප්‍රචණ්ඩ ක්‍රියාවන්හි යෙදුනවුන්ගෙන් මෘදු ලෙස ඉල්ලා සිටින තෙක්ම හිංසන ක්‍රියාවන්ට බාධා කරන්නට කිසිවෙක් නොවීය.
'කොටි සහ පතොරම් පෙට්ටි'
මේ නීච ක්‍රියා යුක්ති යුක්ත කරනු පිණිස තමන් විසින් කොල්ල කන ලද නිවෙස් පිළිබඳ ප්‍රබන්ධ නිර්මාණය කර පැතිරවීමට ද ඇතැම්හු කටයුතු කළහ. ඒ අතර, පහර දුන් නිවෙස්වල තිබී හමු වූ පතොරම් පෙට්ටි සහ පුපුරන ද්‍රව්‍ය ගැන කතාද, ඒවායේ සිට කොටි නායකයන් දෙදෙනෙකු හමුදා අත්අඩංගුවට පත් වූ කතා ද විය. නමුත් ඒ පිළිබඳ වැඩි දුරටත් හරස් ප්‍රශ්න මතු කළ විට තමන් ඒ පිළිබඳ දෙවැනි හෝ තුන්වැනි පාර්ශ්වයකින් දැනගත් වග ඔවුහු කීහ.
ඇඳිරි නීතිය මධ්‍යයේම සින්ටෙක්ස්, කුණ්ඩන්මාල්ස් සහ හයිඩ්‍රාමනී ඇතුළු කර්මාන්ත ශාලා බොහෝමයක් ගිනි තැබූ පිරිස් අනතුරුව ගෙන් ගෙට යමින් දේපළ විනාශ කිරීමෙහි නිරත වූහ. වීදි ඔස්සේ ඔබ මොබ යන අවිගත් මැරයන් දිරි ගැන්වීමෙන් නොනැවතී, ඔවුන් හා එක්ව හිංසයන්ට දායක වන්නටද හමුදාවෝ කටයුතු කළහ. කොල්ලකෑමේ යෙදෙන්නන්ට වෙඩි තබන බවට ගුවන් විදුලිය ඔස්සේ රජය නිවේදනය කර සිටියද, කලහකාරීන් එය මායිම් නොකළේ පොලිසිය හෝ හමුදාවන් කිසිදු ක්‍රියාමාර්ගයක් නොගන්නා බව ඔවුන් දැන සිටි නිසාවෙනි. ඇතැම් තැනෙක මැරයන් වළකන්නට උත්සාහ කළ පොලිස් භටයන්ට හමුදාවේ තර්ජන පවා එල්ල විය.
1983 ජූලි 27
අද මා සිටින්නේ මහනුවර නගරයේය. දැන් වේලාව රාත්‍රී 10 පසු වී තිබේ. මා මෙහි පැමිණියේ කොළඹට වඩා නුවර තත්ත්වය යහපත්දැයි දැනගනු පිණිස ය. කොළඹ තත්ත්වය දැන් සෙමින් සංසිඳෙමින් තිබුණ ද මහනුවර වාතාවරණය තවමත් අවදානම් සහිත එකකි. ප්‍රහාරයන් සඳහා මැර පිරිස් යළිත් පැමිණෙන බවට රාවයක් මා මේ ලියන මොහොතේත් පැතිර යයි. කොළඹ බලා පෙරළා යන්නට කල්පනා කර සිටියත්, එය නොහැකි වූයේ පස්වරු හතරට පනවන ලද ඇඳිරි නීතියට කලින් පිටව යන්නට ඉඩක් නොවූ හෙයිනි.
නගරය පුරා සැරිසරන මැර පිරිස් වෙළෙඳ සැල් සහ නිවෙස් ගිනිබත් කරමින් දෙමළ ජනයාට අයත් කාර් සහ ලොරි රථවලට පහර දුන්හ. බස්රථ නවතා එ්වායේ ගමන් කළ දෙමළ ජනයා බිමට බස්වා පහර දෙන ලද අතර ඇතැමුන් ඝාතනය කරනු ලැබුණි. මෙහි සියළු ‘වැඩ කටයුතු’ ආණ්ඩුව විසින් සැළසුම් කොට හමුදා සහාය යටතේ සිදුවන බවක් පෙනෙන්නට තිබේ. බොහෝ ප්‍රහාරයන් සිදුව ඇත්තේ ඇඳිරි නීතිය බල පැවැත් වූ හෝරාවන්හිදී ය.
තත්ත්වය පාලනය කිරීමට සමත්කමක් ආණ්ඩුව නොපෙන්වයි. ත්‍රස්තවාදය වැළැක්වීමේ පනත යටතේ වැලිකඩ රක්‍ෂිත බන්ධනාගාරයේ රඳවා සිටි දෙමළ සිරකරුවන් 35 දෙනෙකු සෙසු සිරකරුවන් විසින් මරා දමා ඇතැයි ආණ්ඩුව ඊයේ (26) නිවේදනය කර සිටියේය. මා සිතන ආකාරයට මෙය මුළුමණින්ම ගොතන ලද කතාවකි. ආණ්ඩුව ඔවුන් ඝාතනය කර වූ බව සක් සුදක් සේ පැහැදිලි ය. මරා දැමුණවුන් අතරට කුට්ටිමනී, ජෙගන්, යෝගචන්ද්‍රන්, කාසිනාදන්, බාලචන්ද්‍රන්, කුමාරස්වාමි සහ සුබ්‍රමනියම් ද අයත් බව වාර්තා වේ. බන්ධනාගාර මහේස්ත්‍රාත් ඝාතන ගැන පරීක්‍ෂණ පවත්වන බව ද කියනු ලැබේ!
හෙට කුමක් වනු ඇතිද?
කොල්ල කෑමේ නිරත වූවන්ට වෙඩි තැබූ බව සෑම අඩ පැයකටම වතාවක් ගුවන් විදුලිය ඔස්සේ ආණ්ඩුව නිවේදනය කර සිටියි. නමුත් එළඹෙන දවස් කිහිපය තුළ කුමක් වනු ඇතිදැයි නිශ්චිත වශයෙන්ම කීමට මට නොහැකි ය. නමුත් වඩාත් නරක දෑ - ඇතැම්විට දේශපාලන කුමන්ත්‍රණයක් වුව ද - ඉදිරි දිනවල සිදුවීමට ඉඩ තිබේ. ගත යුතුව තිබූ තීරණාත්මක පියවර ආණ්ඩුව විසින් නොගත් නිසා, ජනතාව ඒ වගකීම සිය දෑත්වලට ගත් බව සාමාන්‍ය ජනයා පවසති. ඔවුනට කරුණු පහදා දී, මේ ක්‍රියාවන්හි නිශ්ඵල බව ඒත්තු ගැන්වීමට අප අතළොස්සක් දෙනා උත්සාහ කළද, සහේතුකව කල්පනා කිරීමට හැකියාවක් ඇත්තවුන් මුණ ගැසෙන්නේ අල්ප වශයෙනි. ඇත්තෙන්ම අපට කළ හැක්කේ, තත්ත්වය යහපත් අතට හැරී මනුෂ්‍යත්වය සහ සබුද්ධිකභාවය පෙරළා පැමිණෙනු ඇතැයි බලාපොරොත්තු වීම පමණි.
අද රාත්‍රියේ සහ හෙට දවසේ කුමක් සිදුවනු ඇතිද? එක් දෙයක් පැහැදිලි ය. මේ සිදුවීම්වලින් පසු දකුණේ රැඳී සිටිනු ඇත්තේ දෙමළ ජනයාගෙන් සුළු පිරිසක් පමණි. මහා පරිමාණයෙන් ගේ දොර හා ගම් බිම් හැරදමා යාමක් සිදුවනු එ්කාන්ත ය.
දැඩි ස්ථාවරයක් ගැනීමට ඔබ දන්නා වෘත්තීය සමිති ක්‍රියාකාරීන්ට බලපෑමක් කළ හැකිදැයි මදක් විමසා බලන්න. පසු ගිය දින කිහිපය තුළ සිදු වූ මහත් වූ අපරාධ ඔවුන් මේ සඳහා පොළඹවා ගැනීමට ආධාරක වන්නට ඉඩ තිබේ. බ්‍රිතාන්‍ය ගුවන් විදුලිය සහ ඕස්ට්‍රේලියානු ගුවන් විදුලි සේවය විසින් බොහෝ දුරට නිරවද්‍ය වර්තා ප්‍රචාරය කරන ලදී. සන්නද්ධ දෙමළ තරුණයන් හමුදා සේනාංකයට පහර දීමට තීරණය කරන ලද්දේ සොල්දාදුවන් විසින් තරුණියන් තිදෙනෙකු දූෂණය කිරීමෙන් ඉන් දෙදෙනෙකු දිවි නසා ගත් නිසා බවට වන කට කතාවක්ද මෙහි පැතිර යමින් තිබේ. එහි සත්‍යාසත්‍යතාව තහවුරු කිරීමට මට නොහැකි ය.
වැඩි දුර තොරතුරු සමග නොපමාව තවත් වාර්තාවක් එවන්නට මම කෙසේ හෝ උත්සාහ කරමි.☐
© JDS