උතුරේ දෙමළ මාධ්‍යවේදීන් කොළඹ අපරාධ කොට්ඨාශයට කැඳවයි
- Post 27 April 2015
මන්නාරම සහ වවුනියාව ප්‍රදේශයේ මාධ්‍යවේදීන් සිව් දෙනෙකුට කොළඹ අපරාධ කොට්ඨාශයට වාර්තා කරන ලෙස දන්වා තිබේ. වවුනියාව හා මන්නාරමේ පොලිස් ස්ථාන හරහා අදාළ මාධ්‍යවේදීන් වෙත දන්වා ඇත්තේ අඟහරුවාදා (28) දිනයේ දෙමටගොඩ පිහිටි කොළඹ අපරාධ කොට්ඨාශයට පැමිණ ප්‍රකාශයක් ලබා දෙන ලෙස ය. එහෙත් ප්‍රකාශ ලබා දිය යුත්තේ කිනම් හේතුවක් නිසාද යන්න ඔවුන්ට දන්වා නොමැති බව ශ්‍රී ලංකා දෙමළ මාධ්‍යවේදීන්ගේ සංගමය JDS වෙත ප්‍රකාශ කළේය.
මන්නාරමේ ජනමාධ්‍යවේදීන් වන ඇන්තනි තේවරාජන් මාර්ක් (ජාතික රුපවාහිනිය), ජූඩ් පැලිස්ටීස් (ස්වාධීන රුපවාහිනිය), ලැම්බර්ට් රොසයිරෝ (නිදහස් මාධ්‍යවේදී) සහ වව්නියාවේ බීබීසී හා වීරකේසරී මාධ්‍යවේදී පොන්නයියා මානික්කවාසගම්ට කොළඹ අපරාධ කොට්ඨාශයට පැමිණෙන ලෙස දන්වා ඇත.
2009 පළ වූ වාර්තාවක්
මේ අතර මන්නාරමේ තවත් මාධ්‍යවේදියෙකු වන ජේම්ස් ජෝශප් ප්‍රනාන්දු ගෙන්ද ප්‍රකාශයක් ලබා ගැනීමට අවශ්‍ය බව පොලිසිය ඔහුට දැනුම් දී ඇත. ඔහුට ද කොළඹ අපරාධ කොට්ඨාශයට පැමිණෙන ලෙස කීවද ඒ වන විට ජේම්ස් ජෝශප් යාපනේ සිටින බැවින් යාපන පොලිසියේදී අදාළ ප්‍රකාශය ලබා ගැනීමට ඊයේ (26) දිනයේදී කටයුතු කළ බව ඔහු JDS වෙත ප්‍රකාශ කළේය.
මන්නාරම මාන්තෙයි ප්‍රදේශයේ නැවත පදිංචි කිරීම් පිළිබඳව වීරකේසරී පුවත්පතට 2009 වසරේ ඔහු සැපයු වාර්තාවක් පිළිබඳව මෙහිදී ප්‍රශ්න කර ඇති අතර පොලිසිය විමසා ඇත්තේ අදාළ ලිපිය සකස් කිරීමට ලබා ගත් තොරතුරු මුලාශ්‍ර පිළිබඳව ය. එවකට පුනරුත්ථාපන හා නැවත පදිංචි කිරීම් භාර අමාත්‍යවරයා වු රිෂාඩ් බදුර්දීන් වත්මන් යහපාලන ආණ්ඩුවේද කැබිනට් ඇමති ධුරයක් හොබවයි.☐
© JDS
සබැඳි පුවත්:
10.04.2015 - යාපනයේ මාධ්‍යවේදීන්ට එරෙහි පොලිස් තර්ජන යළිත් ඉහළ යයි
23.01.2015 - 'සන්නද්ධ කල්ලි නිරායුධ කොට ඝාතකයින් හෙළි කරනු'